激似5c硬撼紅米 魅藍note平霸登場
更新日期: 2014 年 12 月 31 日
小米同魅族嘅手機都係賣性價比，旗艦級規格賣中階機價錢，所以有唔少人留意。小米出咗部紅米Note，5.5吋屏幕、支援4G，$1,199有交易。而魅族喺聖誕前宣佈推出魅藍 note，由定價、規格、甚至個名嚟睇，都係針對紅米Note嚟打。
機背似足iPhone 5c
魅藍 note機面用黑色，光滑機背膠感強烈，有藍、綠、黃、白、粉紅5隻色可以揀，望上去就覺得似曾相識，同iPhone 5c可謂同出一轍 (5c都有呢幾隻色)。其實官網介紹都話機殼材料同5c類似，「顏色都是聚碳酸酯原料本色。所有顏色均由魅族在業界一流的供應商 SABIC 訂造，獨一無二，卻又似曾相識。」(節錄自官網)，似乎喺度暗示跟住5c設計。
魅藍 note啲邊位就圓啲同斜啲，冇5c咁直，同MX4 Pro差不多。
一個SIM卡槽裝晒兩張SIM卡。
規格勝紅米Note
魅藍 note 標榜自己係「青年良品」，目標顧客群似乎係年青人，所以定價比較低，16GB賣人民幣$999，計返大約港幣$1,250。雖然貴過紅米Note幾十蚊，但規格上魅藍 note高過紅米Note，睇下以下個規格比較表：
香港用要買聯通版
魅藍 note有兩個版本，分別係中國移動版同中國聯通版。顧名思義，分別在於支援唔同網絡嘅3G同4G制式，要喺香港用到3G、4G，就要揀中國聯通版。首先推出嘅會係中國移動版，中國聯通版會喺2015年初開賣，所以想買返部嚟玩下就要等多一陣。有興趣可以去京東商城或官網預約，京東商城會喺1月5號再有貨，到時可以睇下有中國聯通版未 (但可能要自己裝Google Play Store)。
根據之前經驗，魅族手機出香港版，除咗喺自己專門店開賣，仲可能會同個別一兩間電訊商同電器連鎖店合作，例如MX4 Pro就係csl同衛訊。
Citibank Reward卡：電訊商 (包括衛訊) 簽賬有5X積分
匯豐：最紅自主獎賞「賞玩樂」(電訊商) /「賞家居」(電器連鎖店) 6X「獎賞錢」，不過最紅星期五11X「獎賞錢」唔知會唔會延長。