​搶特平機票有竅門
​搶特平機票有竅門
相關信用卡:

​搶特平機票有竅門

發表日期: 2015 年 10 月 29 日 更新日期: 2015 年 10 月 29 日 旅遊
作者:積克

最近HK Express推出$22機票,唔知各位有冇搶到一、兩套?當中日、韓都係比較受歡迎嘅地方,要搶到理想日期同時間嘅來回機票,就要一開賣時捕住,先有機會買到。如果遲咗,隨時得返去程或回程有特平機票。佢最近做$32同$22特平機票優惠,我都分別買咗兩套來回日本機票,朋友都問我點搶得到,我就喺度分享少少心得,希望幫到大家下次順利搶到特平機票。


多機同步
一開賣時會好多人一齊搶,所以會好塞車,有時揀完地點、日期,要等一輪先可以Load到結果。同時有啲航空公司網站只會容許一個查詢,要逐次Check,有時平飛俾人買晒都未Check到。可以的話,準備一部電腦、一部Tablet、一部手機,多機同時Check,就可以同一時間搵幾個地點或日子,提高成功搶飛機會。如果冇咁多部機,都可以試下同一部機用唔同瀏覽器去Check。記住要有耐性,唔好見佢Load得耐就「F5」Refresh,重新Load過又要再等,機票隨時被人買咗。

除咗多機 / 多瀏覽器同步,當然仲要有堅持。例如半夜12點開賣,通常一開始太多人同時Search,會Load得好慢,我就會等到買到先去訓,因為到咗第二朝,通常冇乜貨剩,最多剩返一啲近期出發嘅飛,買到都請唔切假。等到返工嗰陣先上網買,要躲避老細、上司同同事嘅視線,又多數冇平飛食白果,咁咪盞浪費時間?

Open jaw模式
如果唔係諗住Weekend兩日一夜玩快閃,而係諗住去四、五日或以上,可以考慮Open jaw方式,即係分開兩個地點,例如香港飛去名古屋,大阪飛返香港,時間許可就可以關西遊。呢種玩法除咗啱去多幾個地方,當某個地方嘅平機票「有去冇回」或者「有回冇去」,亦可以用另一個鄰近地點出入境。

旅遊網輔助搜尋
買機票最直接梗係去航空公司官網買,而有啲旅遊網亦可以搵到幾間航空公司嘅機票,例如Ctrip可以Search到HK Express同香草航空機票。開賣時官網塞緊車,去旅遊網就有可能搵到,甚至Load得快過官網。不過搵起上嚟可能冇官網咁方便,但都可以作為輔助。

等待下次特價
如果得返日期時間都啱嘅單程特平機票,但冇辦法自製Open jaw,我都會買咗單程先,點解呢?有留意開機票優惠,都會發覺某啲廉航優惠其實係一個接住一個,一啲$100以下淨機票,每兩、三個月左右就做一次。如果出發距離而家仲有一段時間,例如半年,可以買住單程先,等佢再出特平機票先後補返未買嗰一程。當然,下次優惠幾時出,有幾平,就真係到時先知,搏唔搏大家自己決定喇。

不同航空公司機票
而家有咁多間廉航,間間都輪住做優惠,要買平機票有好多機會。正如之前所講,見到呢間平,可以買咗單程先,下次見到其他航空公司更抵的話,再買另一程。

可要求退機場稅及燃油附加費
有時見到平機票,都會因為價錢平而買咗先,未知到時請唔請到假去。萬一行唔開去唔成,可以提前要求航空公司取消機票同退返離境稅,不過機票錢通常都冇㗎喇。至於退燃油附加費,某啲航空公司可能要收手續費,雖然變相退唔足,都好過全蝕嘅。

買機票用咩卡?
網上買機票,自然要用網購有優惠嘅信用卡。就以我買咗$22香港來回福岡機票,連稅$324為例,用以下幾張比較常用嘅網購信用卡可以賺到網購獎賞。



東亞i-Titanium卡
獎賞:網購3% i-Dollar回贈,每月上限回贈$200 i-Dollar
可賺獎賞:$9.72 + $1 ($250=$1基本回贈)
獎賞價值:$10.72

中銀i-card
獎賞:網購10X積分 (每月上限額外10,000分)
可賺獎賞:324基本積分 + 2,916額外積分 = 3,240分
25,000分=$100現金券
獎賞價值:$12.96
15分=1 Asia Miles里數
兌換里數:216里數
兌換里數手續費:最低$100,最高$300

信銀國際motion信用卡
獎賞:網上交易額外5%現金回贈,每月回贈上限$100
可賺獎賞:$16.2 + $1.782 (0.55%基本回贈)
獎賞價值:$17.982

建行(亞洲)eye卡
獎賞:網上零售交易5X積分
可賺獎賞:1,620分
25,000分=$100現金券
獎賞價值:$6.48
15分=1 Asia Miles里數
兌換里數:108里數
兌換里數手續費:最低$100,最高$300

DBS Eminent Card
獎賞:網購6%額外現金回贈 (該月累積零售簽賬$5,000或以上,每月回贈上限$300),指定網上商戶 (HK Express) 4%額外現金回贈 (每月回贈上限$120)
可賺獎賞:$19.44 + $12.96 + $1 ($250=DBS$1)
獎賞價值:$33.4