​抽新居屋機會渺茫 上車另覓途徑

新居屋而家可以入紙申請，1月12號截止，各位綠 / 白表申請人交咗表未？房委會話暫時收到5410份申請表，超額申請1.5倍，當中九成七係白表，即係5,260份白表，150份綠表。以目前數字計，按照配額比例 (綠表:白表=6:4)，綠表申請人應該全部都會中籤，剩低配額會撥晒去白表，即係話，五千幾份白表爭二千個多少少單位，大約有38%中籤機會。不過離截止仲有成個星期，應該仲有好多人未交表，最後中籤機會率可能會再低啲。好喇，做人要有兩手準備，若果真係咁唔好彩抽唔中，都要搵下其他上車方法。

「白居二」年中再開
本來二手居屋只有綠表申請人先可以買，不過房委會喺2013年推出俗稱「白居二」嘅「擴展居者有其屋計劃第二市場至白表買家」臨時計劃，等白表申請人都可以買未補地價嘅二手居屋。房委會決定今年年中會在推「白居二」，推出2,500個配額，可以喺領取到「購買資格證明書」後12個月內搵樓。

不過二手居屋售價亦升唔少，喺2014年12月嘅成交呎價普遍去到$5,000-$6,000，部分屋苑例如筲箕灣愛蝶灣、彩虹采頤花園、旺角富榮花園、將軍澳寶盈花園去到$7,000以上，一個五百幾呎單位就要四百萬。而位於新界 (天水圍、屯門、粉嶺) 或樓齡較大嘅，成交呎價可以做到四千幾。各位有興趣可以去房屋署網頁睇下成交紀錄。至於按揭方面，銀行最高可以做到九成按揭，分25年供，不過樓齡會影響按揭成數，通常大過20年就會降低，供款年期加樓齡唔可以超過某個數(e.g. 40年)，所以樓齡愈大，亦可能會縮短供款年期。

申請公屋搏特快編配
有唔少後生仔女一夠18歲就即刻排隊輪公屋，單身人士申請唔知要輪到幾時，一般家庭平均都要三年以上先上到樓。不過如果遇著房屋署有出「特快公屋編配計劃」，可以登記咗先，搏有得快啲上樓。不過機會率比抽居屋仲細，以最近一次為例，八萬幾個申請爭千幾個單位，叫做多個渺茫嘅機會。好彩上到樓，住夠三年就可以用綠表抽居屋，即使係單身人士，機會都大好多。不過呢啲特快編配單位入面，有啲嘅層數、座向、單位設計會比較差，有少數就係發生過命案嘅凶宅，睇下你可唔可以頂到三年喇。

私樓新盤睇細單位
公營房屋無望，自然要回歸私樓。二手上車盤不離嘉湖山莊、沙田第一城之類老牌屋苑，而家叫價座底350萬。至於新盤可以留意下將軍澳緻藍天、紅磡悅目，睇下今次又會唔會有「奇則」出現。如果係單身或二人小家庭，可以留意西營盤星鑽。