​手機變信用卡 隨時PayPass買嘢 (實際應用篇)

​手機變信用卡 隨時PayPass買嘢 (實際應用篇)

相關信用卡:

​手機變信用卡 隨時PayPass買嘢 (實際應用篇)

發表日期: 2015 年 07 月 29 日 更新日期: 2015 年 07 月 29 日 生活

作者:積克

最近HKT香港電訊推出《Tap & Go「拍住賞」》服務,可以將手機變成虛擬MasterCard,隨時用PayPass或上網買嘢。上次講完申請、啟動、增值等基本資料,今次就實際測試下,睇下點樣增值同交易。

門市現金增值
目前Tap & Go只可以用大新信用卡做自動同隨時手動增值,由於我冇大新卡,所以只有去csl門市入現金增值。增值金額由$100起,每日最多可以增值$3,000。去到門市,我以為要好似八達通咁要放部手機埋去感應器度增值,原來唔使,店員會問你手機號碼,佢就會喺電腦入數,所以應該可以幫其他人入數。


店員一幫我增值,即刻收到SMS提示。


零售交易
增值完之後我去便利店買嘢做測試,去到收銀時都係同店員講我用PayPass俾錢,不過遇著唔知咩係PayPass嘅店員,就直接話:「我嘟信用卡。」,又或者指下個感應器,然後話:「我用呢個俾錢。」,佢哋就會即刻明。

同一般信用卡用PayPass交易一樣,將部手機拍埋感應器,感應到之後幾秒,就會出單。

如果關咗「隨時付款」功能,俾錢前就要入去「付款」入密碼,先可以感應俾錢,有30秒時間俾你拍機。


扣到數就會有提示。


網上交易
Tap & Go張虛擬信用卡有卡號碼、有效日期同CVC2驗證碼,可以當普通信用卡做網上交易,即管試埋網上交易。我去淘寶買咗對本書同Figure,夾埋人民幣140.6,淘寶海外信用卡要收3%手續費,Tap & Go收2%外幣交易手續費,換返港幣總數$184.4。

 

喺App主頁撳「卡資料」,就會睇到信用卡資料,喺網站付款頁同平時一樣照入就得。

如果設定咗交易提示,成功過數之後就會即刻收到SMS提示。


喺主頁「交易紀錄」入面可以睇返增值同交易嘅商戶名稱、金額同日期。

用?唔用?
呢個服務做到PayPass同網購功能,不過冇得好似一般信用卡咁賺積分回贈,得MasterCard樂遊賞,吸引力似乎不大,用返八達通仲方便。當然,如果佢有多啲合作商戶,又推多啲比較著數嘅優惠,例如嚟緊759阿信屋半價,都可能會吸引到多啲人用。上次提過而家只有大新信用卡可以增值,不過我打電話問過大新CS,增值賺唔到積分或回贈,咁我直接用信用卡做PayPass同網購仲著數。

不過佢唔需要好似銀行流動付款咁要有信用卡先可以用到,申請亦唔使用交入息要求之類嘅文件,只要係csl手機客戶就可以申請,咁一啲冇入息證明,或者做Part time唔夠入息申請信用卡嘅人士,就可以用嚟做網購,例如學生玩手機Game買寶石,家長可以入錢落去,唔怕仔女狂賣簽爆卡。

另一方面,佢唔可以好似八達通咁負數,爭少少都要再入錢,即係唔用嗰陣有好大機會會因為用唔盡而蝕咗。如果取消張卡想退返餘額,要俾$60手續費,3個月內退款。

在我而言,我本身都有PayPass卡,如果唔係因為想試玩下新嘢,我諗我都未必會申請呢個服務。而家試完入面剩返$5.7,要睇下超市、便利店有咩係剛剛好係呢個價先。

相關文章:
手機變信用卡 隨時PayPass買嘢 (基礎篇)