​惡意沽空要打靶!
​惡意沽空要打靶!
相關信用卡:

​惡意沽空要打靶!

發表日期: 2015 年 08 月 06 日 更新日期: 2015 年 08 月 06 日 生活
作者:任以風

大陸救市又出新招,滬深交易所將融券(借貨沽空)由「T+0」改為「T+1」,我當堂嚇咗跳,然後得啖笑。


之前有寫過何謂沽空(先高賣,後低買),在限制很少的市場,基本上你借完貨就可以即刻放,同日低位買回(順利的話),一日內平倉就是「T+0」模式,而「T+1」即是借完貨放售,第二日先可買回。蝦蝦蝦,亂來!

或者大陸當局覺得自己可以填滿所有短炒造低嘅賺錢機會,不過天要下雨娘要嫁人,無嘢可以阻到中國人賺錢。

7月31日內地《証券市場周刊》刊登一篇叫做「警防博耳電力的價值陷阱」的文章,內容洋洋灑灑,學足沽空機構啲報告話博耳電力(01685)營運數據做假乜乜乜,神奇地香港市場前日早上才有反應,股價最多跌24.5%,之後公司管理層緊急舉行電話會議,逐點澄清,收市跌7.1%,股份昨日停牌。

先不論指控與澄清邊個真,重點是今次空軍暫時獲利已經超過兩成,公司業務底好係唔應該怕人沽你,這是市場。如果怕人沽,會唔會係因為「有人」令A股市場啲股價普遍升到同業務價值完全脫勾呢?唔夠人玩就出公安,強仔,你醒下啦。

P.S. 唔知相關人士算唔算惡意沽空呢?如果係就要貫徹執法力度,搵解放軍掃佢場。不過更加大問題係阿爺等錢買股救市,你竟然拎錢去勾結境外勢力玩沽空,死罪也。