​恒生都有World MasterCard

最近恒生新出咗一張優越理財World MasterCard，雖然申請呢張卡嘅年薪要求只係$48,000，但一睇個名，都估到只限優越理財戶口客戶申請 (所以年薪要求先咁低)。咁呢張卡有咩特別呢？即刻同大家研究下。

優越理財客戶專用
要申請呢張卡，一係你就已經用緊優越理財服務，一係就即刻開戶，而喺3月31日前開戶，最低開戶金額減到$500,000同豁免首年月費，同埋可以賺$600 Cash Dollars。

迎新送$400 Cash Dollars
喺4月30號前成功申請，頭60日簽賬滿$10,000，就有$400 Cash Dollars，現有恒生卡用戶都可以賺到呢個迎新優惠。另外，呢張卡係永久免年費。


全年5X Cash Dollars
簽賬優惠方面，恒生優越理財World MasterCard除咗可以賺普通卡同特選信用卡嘅食肆同商戶全年同期間限定優惠，佢將普通卡個海外外幣簽賬同本地商戶免息分期付款購物滿$5,000或以上嘅全年3X Cash Dollars優惠，升級咗做5X，全年最多賺$3,000 Cash Dollars。

生日月簽賬送$200 Cash Dollars
喺生日月份用呢張卡簽滿會有額外$200 Cash Dollars，但要簽$10,000或以上 (買禮物俾自己，同自己慶祝？)，計返係2%。反而生日月份去W Hotel食飯有85折同送紅酒一支 (4位或以上) 呢個優惠，我覺得重實際啲。

支援MasterCard Contactless支付
作為一張MasterCard，佢都支援PayPass非接觸式支付功能，不過網頁上面就唔係寫PayPass，而係寫「MasterCard Contactless」付款功能。唔理個名點寫，其實都係同一樣嘢啦。

總結：多一張卡傍身
對比起其他銀行嘅World MasterCard，主力儲里數嘅人唔會考慮呢張卡 (因為冇得換里數)，優惠方面，佢嘅獨有優惠係外幣同分期簽賬5X Cash Dollars，回贈比率係2%，只係一般，同埋得MasterCard提供嘅World MasterCard基本禮遇，普通啲囉，叫做多一張永久免年費嘅卡傍下身，或者可以等有特別好賺嘅優惠時先用嘅。