​微曲皮背 LG G4登場

三月時旗艦機HTC One M9同Samsung Galaxy S6 / S6 Edge喺差不多時間發表，但就唔見LG。雖然LG喺2月時都出咗另一部高階機G Flex 2，不過好多人都觀望G4幾時出。直到今日，終於等到LG G4出場。

微曲機身 皮革機背
LG G4嘅主要按鍵仍然喺機背，而機身有輕微彎曲，據LG講呢個設計會好揸手啲，同埋耐跌啲。而機背就有仿金屬菱形鑽石紋機背，更有鋪咗真皮嘅機背可以揀，真皮質感應該比Samsung Galaxy Note 4嗰種仿皮紋殼好好多。由於佢可以換電，所以背殼係可以隨時換，不過用真皮殼會唔會影響散熱呢？估計可能同平時用一個厚啲嘅保護殼一樣？



棄八核用六核處理器
G4內置3GB RAM、32GB ROM、5.5吋 2,560 x 1,440屏幕、3,000mAh電池、可插SD卡同換電，都同上一代G3一樣。之前網上一直有傳高階處理器Qualcomm Snapdragon 810有過熱問題，雖然LG G Flex 2都係用呢粒U，但G4就用Qualcomm Snapdragon 808六核心處理器，唔知係咪真係如傳聞所講呢？不過810係八核，808係六核，可能會對效能造成少少影響。

手動模式相機
影相方面亦係G4嘅買點之一，1,600萬像素、f/1.8光圈、OIS三軸光學防手震，改善夜攝效果。除咗原有紅外線快速對焦，仲有Color Spectrum Sensor，感應環境光源同物件，得出更準確嘅色彩同白平衡。

最好玩嘅係加入手動模式 (Manual mode)，就好似用專業相機咁，可以控制快門速度、白平衡、ISO、曝光補償數值、仲有手動對焦，快門持續打開，同埋Save做RAW格式，鍾意影相嘅朋友應該會幾啱玩。

幾時出？賣幾錢？
LG G4預計喺五月開賣，分別有單卡版同雙卡雙待版，兩者分別只在於支援頻譜，售價都係$5,698。

新一代旗艦機比較
新一代旗艦機仲有之前提過嘅HTC One M9同Samsung Galaxy S6，LG G4同佢哋比，邊部好啲呢？我就比較鍾意LG G4同 Samsung Galaxy S6，多過 HTC One M9，其實我偏好金屬機身，不過HTC One M9其他方面冇乜大突破，不如買返M8。至於Samsung Galaxy S6，改用咗金屬框同玻璃面，總算好過S5個膠殼，仲有埋雙卡雙待，改得唔錯。而LG G4最吸引我嘅，就係手動影相模式，雖然好難同專業級相機比，自己亦唔係發燒影友，影相技術只懂皮毛，不過可以喺手機玩M mode，又幾好玩。


邊張卡買機有著數？
假設我要買部LG G4，售價$5,698，如果去大型電器連鎖店買，睇下用邊張卡買機會特別有著數。

匯豐
適用商戶： 百老匯、中原電器、豐澤、蘇寧、衛訊
「最紅自主獎賞」「賞家居」6X「獎賞錢」，「最紅星期五」11X「獎賞錢」，Visa Signature卡「最紅自主獎賞」類別額外3X「獎賞錢」

Citibank Rewards卡
適用商戶：衛訊、領域
5X積分

獎賞價值比較

匯豐
6X「獎賞錢」：$135「獎賞錢」
11X「獎賞錢」：$248「獎賞錢」
14X「獎賞錢」：$314「獎賞錢」
以$1「獎賞錢」=$1計：
獎賞價值：$135 (6X) / $248 (11X) / $314 (14X)

Citibank Rewards卡
5X積分：28,490分
以25,000分換$100現金券，250分=$1計：
獎賞價值：$113.96

如果係編配咗落「賞家居」，毫無疑問係用匯豐卡去買會賺到多啲回贈，Citibank Rewards卡嘅5X亦唔錯。除咗呢啲常駐優惠，就嚟到5月，應該會有新嘅電器舖優惠推出，可以再留意下。