​平民食堂-新界必去熟食街市

​平民食堂-新界必去熟食街市

相關信用卡:

​平民食堂-新界必去熟食街市

發表日期: 2016 年 03 月 03 日 更新日期: 2016 年 03 月 03 日 飲食

作者:雅軒


平民食堂-新界必去熟食街市

今次我要介紹嘅係香港既熟食街市。

熟食街市,即係港式Food Court,除咗離島,而家全香港總共有大約25個熟食市場。而家出街想食得平過100蚊,好似好難咁。但係雅軒近年先發現,原來熟食街市有咁多又正又抵食嘅舖頭。

千揀萬揀,雅軒最後揀咗新界區兩個必去嘅熟食中心推介俾大家,第一個就係呢到啦!

大埔墟既市政大樓係全港最大嘅熟食街市,都係最多好評架!


平記麵家-蝦籽豬油撈面 $32
呢個就係平記麵家,最出名就係蝦籽豬油撈麵啦,其實佢所有其他撈麵都有豬油嘅,上咗碟除咗見到好多蝦籽,仲有就係個豬油好香!

林記點心-舊式即蒸點心 $34
之後就行去隔離巷嘅林記點心,好Old School,會見到好多熱騰騰嘅點心,仲有好多大酒樓無點心點心都可以係呢到搵到。重點係呢到D姐姐真係好熱情架,而且點心全部都好實淨!蝦餃一籠只係十一蚊!我食咗三籠加埋茶芥都係用咗$34!

世記上海麵-世記豬扒麵 $32
雖然係呢到叫一碗麵要等半個鐘,飲品仲要係隔離餐廳到叫。不過等佢係值得架!因為個炸豬扒真係好好好好脆,而佢呢隻脆同日式炸豬扒嘅脆又唔同,有少少油,不過好香,仲有炸雞翼揀。
呢個係粗麵,係好似烏冬咁嘅。

我走既時候已經係下午二點,勁多人!勸大家想黎試好野就早過11點會好D啦

跟住我地就黎到沙角村呢個熟食街市啦,呢個係雅軒係新界區第二個會揀嘅熟食市場。

劉萬利咖啡粉麵- 茶餐 $30
輕食類推介!茶餐$29加凍飲$1,都係$30咋!
呢個奶茶好滑好香,茶味係濃既,唔「鞋利」,仲有呢個推介嘅沙嗲牛肉麵,佢係超級多沙嗲汁,濃到不得了,唔咸既,但係真係好濃,仲係配福字伊麵㗎。佢好有我細個係我阿公樓下食個D勁舊嘅茶餐廳個陣味。
超濃沙嗲味,超濃奶茶,呢個就係我地香港人正宗嘅茶餐啦!


新廣發-平價海鮮火鍋 $83
再黎係出咗名嘅平價打邊爐-新廣發啦,真心唔好要求高,因為佢只係$83一位,加曬所有野埋單都係$100左右,仲有埋海鮮任食,而且款式好多,真係好多,好多!
(很重要所以講三次)

金沙角大牌檔-燒乳鴿 $52
之後就係另一間大排檔-金沙角啦,呢個乳鴿一黎到嘅時候我已經見到佢超級油,不過個皮真係脆架,會食到沙沙沙沙聲!佢雖然有油,好似好邪惡咁啦,但係又覺得呢個好食,
無個種乾爭爭嘅感覺,係外脆內軟!好食過沙田雞粥個個囉~~


泰城美食-醉雞煲 $120
去到個到記得要再行入少少,喺正轉角位,所以大家記住望一望個名係咪泰城美食/名城美食,行到去已經飄住一陣醉雞味。非常足料,一煲半隻雞$120, 加埋配料都夠兩個人食。
一黎到隻雞已經超級香超重藥材味加米酒味。個老闆話落雞要分三次倒,D雞先係最滑嘅。
你唔會相信呢個煲只係一百二十元,就可以食到咁多野

今集食咗咁多野都只係用咗$383!!!!
但係雅軒最開心係感受到佢地個份濃濃的人情味,呢個係香港獨有的感覺。
寫住咁多先,仲有港島區同九龍區嘅平民食堂,下集話你知!
大埔墟熟食街市
新界大埔鄉事會街8號大埔綜合大樓二樓
早上5時-晚上10時

沙角熟食中心
沙田圍沙角邨熟食中心
早上6時-凌晨4時