​嘉嘉♥賺完迎新過冷河 重新再賺迎新

某些信用卡本身賺分賺里數嘅能力平平，但有時會推出勁正嘅迎新優惠，例如頭兩個月簽滿指定金額就送一大舊積分或里數、優惠里數兌換率、網上申請再送多啲等等，吸引多啲人幫襯。但只有「全新客戶」先可以賺晒呢啲迎新優惠，現有客戶申請新卡，好多時都只係賺到其中一樣，甚至乜都冇！得個恨字>.<！所以有唔少人會賺完迎新之後，Cut卡，等一段時間之後，如果再有正嘅迎新就再申請再賺過。

不過銀行都唔係傻嘅，如果出咗新卡之後一段時間內Cut卡，就要收行政費。通常呢個期限大約係一年，行政費大約係$500左右，或者係收返迎新獎賞同等價值嘅金額，防止用戶賺完即Cut，又搏你Keep卡期間簽下。

而要申請新卡，銀行亦會限制一段時間之前唔可以係現有客戶，或者取消過信用卡，通常係6個月至1年，呢段時間就即係所謂「過冷河」。譬如嘉嘉我今日收到新卡同啟動埋，假設一年後過咗張卡保留期Cut卡，再等一年，就可以翻生當係新客戶再申請同一張卡，再賺回贈。我整咗個表，方便大家睇下各間銀行嘅新卡保留時間、保留期內Cut新卡行政費同埋冷河期。


以上數據基本上適用於同一間銀行唔同嘅卡，當然有啲卡或者迎新條件會有例外，都係嗰句，睇清楚T&C啦。而當我Check緊資料時，打去Citibank問，第一次CS話Cut新卡係唔限時間，亦冇行政費，嘉嘉心諗：「有冇咁So呀？」，收線之後再打多次去CS，另一位CS接聽，佢話基本上係時間係一年，而行政費係幾多就要視乎張卡有冇簽過，至於條數點計，佢就答唔到。

喺度提提各位有心過冷河賺迎新嘅朋友，不論係Cut卡或者重新申請新卡，最好預多少少時間，例如一個星期，唔好計到盡第366日就去Cut或者申請新卡，免得時間有誤差。另外每間銀行批卡嘅鬆緊程度都唔同，有啲你Cut幾次申請幾次都一樣照批，有啲你Cut完再申請就唔批。

至於邊啲卡應該Cut，就要睇返自己用開邊張卡，例如：
匯豐卡賺「最紅」獎賞
富邦白金卡同Titanium卡賺星期六、日同海外簽賬
Citibank Rewards卡超市、百貨公司、電訊公司5X積分
建行 (亞洲) eye 卡5X網上簽賬
DBS Black卡、渣打WorldMiles卡、Citibank Prestige / PremierMiles、東亞Flyer World MasterCard 儲里數
或者有啲一年會有一度極正Promotion，例如建行 (亞洲) 939分獎賞

以上呢啲常用卡自然要Keep住。至於一啲儲分儲里數慢，又萬年都冇正優惠迎新嘅卡，例如創興、信銀 (國際)，就唔需要猶豫，剪呀XD。