我哋成日鑽研點樣用信用卡賺積分、里數、現金回贈，都係想賺到盡。例如網購會用建行 (亞洲) eye卡、中銀i-card等網上簽賬有額外獎分嘅信用卡，如果再經埋回贈 (Cashback) 網站去訂酒店、機票、網購，可以再賺額外現金回贈，再賺多啲。
回贈網站點玩法？
要賺回贈網站嘅回贈其實唔複雜，就以比較出名嘅TopCashback為例：
首先就係去回贈網站註冊成為會員。
成為會員之後就可以Login，然後Search下有邊個網站有優惠，香港人比較常用嘅網站有Hotels.com、Agoda.com、Expedia.com、Amazon等等，揀啱網站就Click「Cashback」。
例如我Click入去Hotels.com，再Click「Get Cashback Now」，就會跳去Hotels.com，記得睇清楚點樣消費先會有回贈。
TopCashback就會記錄低你去Hotels.com，見到呢段Message，就可以喺Hotels.com訂酒店，成功交易同完成住宿的話，TopCashback就會有回贈俾返你。
回贈通常喺成功交易後幾日會入到TopCashback戶口，可以去自己戶口入面 (Click畫面右上角「Account」) Click「Earnings」睇返賺到嘅回贈。如果過咗兩個星期都收唔到，喺「Customer Care」入面Click「View or lodge claim」，填返交易資料，就可以向TopCashback追下。
之後要拎返錢，可以去「Payout」度揀Paypal，入返Paypal戶口就OK。之後係Paypal戶口登記返香港銀行戶口，就可以過數啦。
網上面有好多回贈網站，除咗TopCashback，我搵多2個 (FatWallet同Ebates) 出嚟，比較下唔同商戶嘅回贈比率： 回贈比率比較表
基本上TopCashback回贈係比較著數，特別係旅遊類網站，不過個別酒店集團就係Ebates比較吸引。
賺回贈注意事項：
基本上TopCashback回贈係比較著數，特別係旅遊類網站，不過個別酒店集團就係Ebates比較吸引。
1. 同一個商戶，喺唔同回贈網站嘅優惠可能會有唔同，所以格價是必須的。
2. 個別回贈網站會有獨家優惠，或限時優惠，所以格價真是必須的。
3. 雖然有時啲回贈比率好高，但都要睇返要買嘅貨品或服務本身個價錢係咪抵買。
4. 記得睇清楚回贈細節，因為買唔同產品或訂唔同服務，回贈比率可能由差異。
5. 買完嘢記得Check住Account，睇下收唔收到回贈，而每個回贈網嘅回贈日子亦有唔同。
6. 要將回贈拎返出嚟，就要用Paypal再過戶銀行。Cashback網站轉去Paypal通常唔收手續費，但Paypal會收轉換港元手續費，美元計係匯率加2.5%。轉咗港幣之後，$1,000或以上轉去銀行唔收手續費，$999.99或以下收$3.5。
7. 用信用卡買嘢如果用外幣找數，記得睇返外幣簽賬手續費係幾多，通常係1.95%。
例如我買嘢買咗$100美金，3% Cashback，即係$3美金，假設匯率係$1美元兌$7.76港幣，信用卡手續費1.95%，買嘢總共要俾$791.13，手續費係$15.13。3美元轉返過嚟香港銀行戶口就係$22.70，當轉唔夠$1,000，扣埋$3.5即係$19.2，大約Cover到信用卡手續費。如果信用卡本身網購都有現金回贈，例如東亞i-Titanium卡 (3%回贈)、DBS Eminent Card (外幣網購3%回贈)、Citi Clear Card (外幣網購2%回贈)，或者免外幣手續費嘅銀聯卡 (前提係要商戶收銀聯)，就可以淨賺。不過以上計算只係粗略估計，只供參考 (戴頭盔先XD)。