​嘉嘉♥尋找聖誕節酒店自助餐 (九龍及新界篇)

之前講完港島區嘅聖誕節酒店自助餐，跟住就輪到九龍同新界啦，夾埋差不多有40間，雖然中間實會有漏網之魚，不過希望都夠大家參考啦^.^。由於有咁多間酒店，啲表比較長，可能係呢度有史以來最長XD，大家慢慢參詳。

經濟之選：
九龍珀麗酒店：晚餐時段同平時一樣，可以慢慢食
九龍維景酒店：價錢適中配套多
香港逸東酒店：首輪晚餐、日式放題都係成人$500以下
麗豪酒店：次輪池畔燒烤自助晩餐每位$500多啲
新樂酒店：午餐激平 (不過唔知有乜食呢？)

奢華之選：
半島酒店：24號晚男士要著禮服，好Grand
香港麗思卡爾頓酒店：香檳任飲，一位要二千幾三千，夠一家四口去其他酒店食

轉戰下午茶時段
如果想食晏，可以等一等，轉食下午茶時段，成人價錢每位接近$200，比午餐平咗三分之一，不過食物選擇可能冇午餐咁多，想慳錢都可以考慮下嘅。

另類選擇
除咗一般自助餐格局，其實仲有其他選擇，例如香港逸東酒店Yaguro嘅日式午餐同晚餐放題，可以食下日本嘢，又或者麗豪酒店嘅池畔燒烤自助晩餐。

開餐賺里數
去下面呢啲酒店入面嘅餐廳食飯，可以$8賺5里數 (最低消費$300，最高$10,000)。不過有啲酒店，例如麗豪酒店就列明聖誕期間飛行里數優惠唔適用，所以訂位時記得問清楚酒店喇。另外，Asia Miles同香港天際萬豪酒店做緊Promotion，聖誕期間去旗下餐廳可以賺雙倍里數。

可賺Asia Miles里數酒店餐廳：
富豪九龍酒店：雅廊咖啡室、Mezzo
富豪東方酒店：儷廊咖啡室
香港皇家太平洋酒店：柏景餐廳
海景嘉福酒店：海景咖啡廊、Mistral
都會海逸酒店：西餐廳
朗豪酒店：The Place
如心艾朗酒店：forte
香港天際萬豪酒店：SkyCity Bistro
九龍酒店：倚窗閣

信用卡優惠
中銀X富豪東方酒店：12月10日或之前預訂4-18位，用中銀信用卡俾晒全費會有7折優惠
上海商業銀行X富豪九龍酒店：12月10日或之前預訂Mezzo半自助晚餐同俾晒全費，會有優惠價$488 (原價$568)

用其他信用卡都會有額外獎賞，嘉嘉我再Recap一次：
交通銀行信用卡：節日同前夕食肆簽賬有10X積分，銀聯鑽石卡簽過$300額外會有2X，等於11X。
上海商業銀行：公眾假期例如25、26號飲食簽賬滿$600以上，就有10X積分
安信信貸：簽滿$150回$1，本地食肆簽滿$800有10X現金回贈，最多額外賺$600
渣打：一個月簽滿$8,000，全港食肆15%現金回贈。