​嘉嘉♥五月糉

不論中西節日，都總會有代表食物，例如過年食年糕、聖誕節食火雞、中秋食月餅、太平清醮都要食平安包，就嚟又到端午節，梗係要食糉啦！如果自己唔識包糉，又或者冇時間包糉，可以喺外面買返幾隻應下節。

豐儉由人
唔知大家鍾意食鹹糉定甜糉呢？嘉嘉我就比較喜歡鹹喇。而家啲糉嘅餡料除咗一般嘅豬肉、鹹蛋黃、紅綠豆蓉、蓮蓉，仲會用好多矜貴嘅材料做餡，例如原隻鮑魚仔、瑤柱、黑松露，真係食得招積呢。不過唔同舖頭嘅糉，大細係有分別嘅，訂之前記得問清楚呀。

冰糉當甜品
對於嘉嘉嚟講，傳統嘅鹼水糉、咸肉糉、紅豆糉成舊都係飯，食半隻都已經飽晒，又容易肥。不過而家有啲糉好似冰皮月餅咁，出咗冰糉，有水果、紅綠豆、芝麻、楊枝甘露口味，半透明皮望落有啲似水晶包，可以當甜品食 (不過都係肥XD)。

信用卡買糉有優惠
我搵咗幾間用指定信用卡買糉會有折嘅優惠出嚟，睇下邊間減得多先：


東海、大家樂、鴻福堂平民化
如果以折後價錢計，東海、大家樂、鴻福堂亦算係較平，大約$40至$70一隻；如果以減幅計，就係鴻福堂減得最多，最平半價都唔使。

例如我用建行(亞洲)eye卡，去鴻福堂門市買4隻黑松露金腿瑤柱冬菇豚肉糭，原價每隻$142，特價每隻$70，一共$280，用payWave俾錢，會有5X積分，可以賺到$1,400分，可以換到$5.6現金回贈或93 Asia Miles里數。

另外大家喺個表度見到大班係最平，買兩隻$56，平均一隻$28，但佢係用銀聯提款卡買。而最矜貴就係半島酒店嘉麟樓嘅金腿乾鮑裹蒸糉，一隻600克夠足料，但原價要成$538一隻@@！等同一餐自助餐！食完唔知係咪扒龍舟會快啲嘅呢？