​化信用卡於無形 流動付款新趨勢

​化信用卡於無形 流動付款新趨勢

相關信用卡:

​化信用卡於無形 流動付款新趨勢

發表日期: 2014 年 10 月 29 日 更新日期: 2014 年 10 月 29 日 生活

作者:炸雞波

講起非接觸式流動付款,大家可能會諗起八達通、Visa payWave、MasterCard PayPass、同埋各銀行嘅手機流動支付服務。隨住科技進步,除咗手機可以代替實體信用卡,更可進一步利用手機硬件,加強流動支付服務功能,再配合埋其他隨身裝置,可以化信用卡於無形,唔使帶卡出街,亦可以進行交易。


Apply Pay自立門戶
最近最熱門嘅流動付款話題,應該係Apply Pay。簡單重溫下Apple Pay嘅原理先,佢可以喺iPhone 6加密儲存信用卡資料,交易時將iPhone放埋去感應卡機,用Touch ID指紋辨識確認身份,就可以過數交易。最近Apple Pay喺美國開始應用 (有人試過喺美國境外都用到),雖然有報道話佢出問題,試過重複收多咗錢,不過據Apple CEO Tim Cook講,服務開始頭三日,就有超過100萬次服務啟動申請,可見用戶其實都樂於嘗試新服務。


商戶另起爐灶
雖然有唔少大型商戶接受Apple Pay,但係亦有例外,例如Walmart,因為佢牽頭嘅Merchant Customer Exchange (MCX) 會推自己嗰套流動支付服務CurrentC,而連帶喺MCX入面嘅部分商戶,都停止支援Apple Pay。MCX成員仲有BestBuy、7-11、Dunkin’ Donuts、Shell等等,都係一大陣營。而CurrentC會透過手機App同掃描QR code付款,而唔係用藍牙或者NFC。CurrentC會Link去用戶嘅銀行戶口、禮品卡扣數,唔會Link去信用卡戶口 (但聯營卡OK),商戶就唔使俾手續費信用卡公司,希望以減少商戶成本作為誘因,同時亦可以Link埋商戶嘅積分計劃戶口,購物自動入分同用獨家優惠、Coupon等。不過CurrentC要掃描QR code,唔係慣常用嘅「嘟」卡或「嘟」機方式,方便程度爭少少。而且唔支援信用卡,冇得儲積分,似乎唔夠方便,喺香港未必推得郁。

指模辨識加強保安
而家有唔少手機都有指模辨識,可以用嚟做流動付款身份認證,可以加強安全性,除咗Apple Pay,PayPal亦同Samsung合作,用GALAXY S5就可以喺網上同店面購物時用指模辨識。

另外,MasterCard亦會推出有指模辨識功能嘅信用卡,免除簽名、入密碼步驟。

智能手錶遞手即Pay
智能手錶作為手機嘅伸延,亦可以配合手機做到流動支付,例如Apple Watch亦支援Apple Pay,放埋去感應卡機,撳兩下掣就過數,連手機、信用卡都唔使拎出嚟。至於Android,相信亦會加緊呢方面嘅發展,有傳Samsung將會喺下一代智能手錶加入NFC同指模辨識,設計出簡單嘅流動支付機制。不過實際應用如何,就要到下年呢兩款智能手錶正式推出時先知喇。

Apple Watch亦會支援Apple Pay。

外國有一款watch2pay手錶,可以將MasterCard預付卡晶片插入去,好似電話插SIM卡咁,用嚟做PayPass流動支付,而張卡本身就可以照碌。
低成本電子手帶
除咗智能手錶,手帶都係流動支付一個方便嘅媒介,遞一遞手就可以俾錢,而且成本比智能手錶平得多。英國Barclaycard就推出bPay,佢內置預付卡晶片,用戶可以由Visa或MasterCard入錢落去,做20英鎊樓下嘅小額交易。西班牙CaixaBank亦出咗手帶,可以Link去現有信用卡戶口,做20歐羅以下交易。

bPay呢類手帶可以帶住落街跑步或者買少少嘢都唔使帶散紙銀包。

電子信用卡整合多張信用卡
一個人幾張卡唔算多,銀包入面總會袋住幾張常用卡。用手機可以儲存幾張卡嘅資料,亦有一啲電子信用卡,入晒咁多張信用卡資料,一卡走天涯。Coin就係一張電子信用卡,上面有屏幕可以顯示每張卡嘅最後4位號碼同到期日,可以當普通卡咁碌。



撳一撳卡面圓掣,就可以「換卡」。
流動付款普及因素
講咗咁多,其實呢啲支付方案會唔會普及呢?我個人覺得係會嘅,始終呢啲方案都係簡化咗交易步驟,落街買少少嘢亦唔一定要帶銀包帶卡,輕便咗,用起上嚟亦夠方便,不過仲要幾方面配合先會普及。

技術同成本層面
例如手機App可以做到幾多信用卡管理功能。又好似Coin咁,佢暫時仲未支援叉電或換電,張卡冇電要買過另一張。成本咁貴,不如用返張膠卡好過。旦凡牽涉到電子儀器,如果冇電,仲用唔用到呢?

安全性
手機或手帶唔見咗,會唔會好易洩漏信用卡資料?或者被人盜用?將信用卡資料轉移到其他裝置,會唔會正常用到?

商戶參與程度
呢點係我覺得最重要嘅,要推行一個新付款平台,要睇返信用卡公司,銀行同商戶肯唔肯加入,點樣拆帳、現有POS系統容唔容易配合等等。例如iPhone 6推出時,見佢有NFC,以為會支援埋Visa payWave同MasterCard PayPass,點知Apple自己搞Apple Pay,食多份手續費,令交易成本高咗。