最近新聞報導話有人嘅信用卡獎賞計劃同Asia Miles戶口被Hack,積分、里數被盜,用嚟換禮品禮券,又或者轉晒做「易賞錢」,過咗落不知名戶口。就連HongKongCard討論區都有會員聲稱成為受害者,損失幾萬里數。雖然事件未知係因為銀行、Asia Miles、還是用戶方面嘅問題,不過用戶平日用電腦、手機上網管理積分同里數時,可以記住以下幾項要點,減低戶口被Hack嘅風險。
登入時留意網址 登入銀行、Asia Miles、航空公司網站時,可以留意下個網址,除咗要確定網址真係官方網站,重要開頭係咪「https://」,如果有就即係資料會被加密,如果冇就可以自己打,再Load一次,見到網址前面變色或者有個鎖嘅圖案,先再登入就比較安全。仲有就係用完之後最好登出賬戶,唔好貪方便喺瀏覽器記錄登入資料。
如果就咁打「www.asiamiles.com」係冇加密。
加埋「https://」就會將資料加密,就算中途被黑客截到都冇咁易Crack到。不過瀏覽器話Asia Miles話有部分資料係冇加密,希望唔關登入賬戶資料事。
勿用翻版 / 破解版軟件 電腦、手機最常被人Hack嘅原因,多數都係因為中毒、中木馬、開後門,而當中用翻版或破解版軟件,正所謂便宜莫貪,你唔知軟件或破解檔會唔會被人加咗料。同時要定期更新系統同防毒軟件,加強防護性。但亦唔好完全依賴防毒軟件,因為誤報或唔報都係有可能發生。
小心虛假網站及電郵 除咗翻版或破解版軟件,有啲電郵或網站會假扮係銀行官方Send過嚟,話要你改密碼之類,引你Click入去,輸入網上理財賬戶登入資料。當然,常用嘅電郵戶口亦有人會扮,如果電郵係登記咗網上理財或Asia Miles,而電郵又被Hack的話,呢啲資料自然亦會被人偷埋。
避免用公共電腦 / Wi-Fi 公共電腦同Wi-Fi係人都可以用,風險比較高,如果有人喺公用電腦裝Keylogger,就會記低鍵盤輸入過嘅Key,包括密碼。另外,經唔使密碼嘅免費Wi-Fi上網,黑客可以好容易截取到資料,所以千祈唔好由呢啲途徑Login網上理財或Asia Miles戶口。
定期改密碼 密碼用得耐,最好定期換一換,唔好怕麻煩,密碼組合最好包含大細楷英文字母同數字,英文字母組合避免用字詞,最好係冇意義嘅隨機字串。
萬一中招點算好? 萬一咁唔好彩被人偷積分偷里數,第一時間通知有關銀行或Asia Miles,同埋報警 (可以去警務署網上電子報案室舉報科技罪案)。根據討論區會員嘅經驗,做完就只有等消息。有關討論可以入嚟
呢度同
呢度。