​凶宅上車 你夠唔夠膽上？

買樓上車，係好多香港人嘅目標，不過而家私樓上車盤閒閒哋都要四、五百萬，居屋都要三百萬，唔靠父幹又有幾多人可以輕鬆上車？唔通真係學某位公子話齋，去少幾次旅行就上到車咩！要搵平盤上車，其實仲有門路，不過睇你夠唔夠膽住囉，講緊嘅就係所謂嘅凶宅。

區區有凶宅
所謂凶宅，即係發生過不愉快事件嘅單位，不論係發生過意外、命案或自殺案，涉及人命傷亡，都會被一般人視為凶宅。各位喺電視或電台靈異節目都應該睇過或聽過唔少呢類故仔，例如「半夜有怪聲」、「見到有人影徘徊」，講到言之鑿鑿咁，所以呢類單位通常都比較少人問津，梗係啦，有陰影嘛，邊個想住一間會令自己有心理壓力嘅屋先？當然，膽生毛、百無禁忌者例外，之前都有地產代理出過一份寫住「適合基督徒」嘅放盤廣告，後來被人知道嗰間係凶宅，可能佢認為基督徒有神照住，冇有怕啩。亦由於呢個原因，通常凶宅會比同區市價低一成至三成，如果事故太轟動，可能連隔籬嘅單位都會受牽連。

凶宅傳聞多
每日咁多人死，凶宅真係區區都有，特別係一啲落成年份較耐嘅樓宇，例如位於鰂魚涌、九龍灣、荔枝角嘅老牌私人屋苑。舉個例，98年喺九龍灣某屋苑就發生過五屍謀殺案，有個神棍知道咗三個信徒阿太有啲錢，就借機喺其中一人位於C座低層嘅屋企作法，叫三個阿太同其中一個阿太嘅兩個女飲加咗山埃嘅符水，殺死晒佢哋然後攞晒啲祭品(即係錢)，再佈局成自殺。五條無辜人命加埋邪門風水佈陣，都咪話唔邪。

更邪嘅係附近居民唔知係心理作用還是乜嘢，又話喺凶宅附近聽到怪聲，又話見到半夜有個身穿校服嘅女仔呆站喺大廈門口，認為係陰魂不散咁話。又有聲稱曾經因為超平租而住過另外一座嘅住客話，見過有白影喺牆上浮出嚟，亦試過訓覺時被一股怨氣摙頸，後來先知原來前住客就係三母女。

五屍命案發生喺7月22號，有人搵返資料，1979年屋苑仲起緊嗰陣，喺C座地盤發生過六死工業意外，而日期係7月21號，加上五屍命案係由一宗跳樓案嘅女事主所留遺書所揭發，正好六對六，又引起搵替身、搵新娘之說，真係信不信由你。

無人敢接手
睇返2012年初成交紀錄，嗰個屋苑其他座數低層單位成交價大約$400萬，而C座就$280萬，有三成差價，對於想上車嘅買家，的確係幾吸引。喺2013年事發單位亦公開拍賣過，底價低過市價三成半，都冇人認投。不過而家樓價迫人，為咗上車，愈來愈多人凶宅都照殺，價錢亦逐漸貼近同區市價。

銀行都怕凶宅
就算你唔怕住凶宅，如果唔係一筆過俾錢買，自然要做按揭。一般人對凶宅避之則吉係基於心理因素，原來銀行做按揭亦有呢種傾向，不過佢哋係由生意角度出發。撇除業主經濟狀況同還款能力，凶宅難放盤，賣價會平啲，估值相應降低；同埋萬一斷供，收返個單位返嚟，要放返出去都難啲，銀行就會保險啲，按揭成數可能會做低啲，甚至唔做呢類單位，買凶宅有機會要問多幾間銀行。