到咗年尾，收到稅單，又要準備交稅。大家有冇足夠儲備交俾稅局？如果一時週轉唔嚟，可能要問銀行借錢幫手。除咗一般私人貸款，好多銀行都有專門為交稅而設嘅貸款計劃，大家有需要可以考慮下。今次我會同大家講下一啲申請稅貸時要注意嘅地方，等大家更容易揀到利息低又啱自己需要嘅稅貸。
Q：稅貸一定要用嚟交稅？
A：雖然「稅務貸款」講明係針對稅務，其實銀行並冇硬性規定借咗筆錢俾你，一定要用嚟交稅，因為筆錢唔係直接幫你交稅，而係入落申請人嘅銀行個人戶口，所以筆錢點樣運用，銀行管唔到。而且而家稅貸貸款額愈來愈高，去到年薪十幾倍都有，交完稅仲可以進修交學費、還卡數、做生意週轉。
Q：何謂月平息？何謂實際年利率？
A：稅貸廣告成日都會標榜「月平息低至 X.XX%」，睇落好似好低，但其實月平息係代表每月還款額嘅利息。不過月平息係未計其他收費，例如手續費同其他費用。
如果要比較邊個稅貸抵借，可以用根據銀行營運守則指引計算出嚟嘅實際年利率，銀行通常會計埋利息、手續費、利息 / 現金回贈、豁免供款額等收支後，得出實際借貸成本比率。實際年利率數值愈低，就代表借貸成本越低，即係更抵借。
Q：應該借幾多？
A：部分稅貸可以借到月薪10倍或以上，就可以按照返自己實際需要借到足。假設除咗交稅，仲想還卡數，一共$50,000，就借$50,000，足夠應付需要，亦唔會因為借得多過實際需要而俾多一筆無謂嘅利息。
Q：點拎最優惠利率？
A：借錢最緊要梗係睇息口，稅貸因為貸款額比私人貸款低啲，利息亦普遍低啲。其實要拎到最優惠利率，係要視乎要借幾多、還款期長短同埋申請人財務狀況。例如最近經常睇財經新聞見到某間銀行稅貸實際年利率最低，但睇返條款，借貸額要差不多成一百萬，還款期12個月，再視乎申請人財務狀況得出嘅月平息利率計出來。如果申請人財務狀況愈良好，所獲得嘅條款就愈優惠。但要拎到最優惠利率，要借一百萬，相信一個普通打工仔應該借唔到呢個數。至於申請人可以拎到咩利率，就要等成功批核之後，收到通知先會知，如果本身有用銀行嘅服務，例如出糧戶口，亦有可能獲得較好嘅借貸條件。
Q：點揀還款期？
A：以前稅貸最長還款期都係12或24個月，由於而家稅貸貸款額愈來愈高，部分稅貸還款期亦加長到48期，如果借得多，可以按照自己嘅還款能力，考慮較長期數。較理想嘅每月還款額係佔收入25%至30%，還得輕鬆啲，亦唔會對日常生活造成太大影響。
Q：有禮品、回贈係咪著數啲？
A：為咗吸引客戶，銀行會有稅貸優惠，例如利息 / 現金回贈、現金禮券、豁免部分期數利息或還款等。不過要拎到優惠，可能需要借夠指定金額，或者同時申請銀行其他服務，例如信用卡、開戶口等，可能會牽涉其他收費。所以唔好覺得優惠吸引就借多啲，超過實際所需嘅金額，否則借貸成本會因為貸款額增加而上升，俾多咗利息，可能蝕返轉頭。
Q：申請一定要去分行？
A：而家科技發達，申請稅貸唔一定要親身去分行或打電話，亦可以用電腦、手機上網申請，入晒資料同Send埋證明文件，就會有專人聯絡你，講返批核情況。有啲仲可以用WhatsApp、Line申請同Send資料，都幾與時並進。另外，有部分稅貸會提供網上申請額外優惠，比較或申請時可以留意下。
Q：一般批核時間要幾耐？
A：只要交齊資料，包括身份證明、住址證明、入息證明，一般五個工作天內就有回覆。有啲稅貸都話可以特快批核，甚至可以即日或翌日批核。
Q：除咗表面借貸條款，仲有乜嘢要留意？
A：除咗借貸額、利率、還款期呢啲主要條件，申請人亦要留意合約入面有冇其他隱藏條件或收費等「魔鬼細節」，例如其他手續費、提早清還使唔使俾額外行政費。條文上有疑問或唔清晰嘅地方，最緊要向銀行問清楚，未得到清晰答案前，千祈唔好心急簽名確認。
Q：舊債未清 新稅貸免問？
A：如果之前已經申請咗私人貸款，而家仲還緊錢，其實都可以申請稅貸，只係稅貸條件可能會有少少影響。
總結：如何選擇稅貸？
要選擇適合自己嘅稅貸，首先要考慮自己嘅實際需要，除咗交稅，仲有冇其他用途？亦要顧及還款能力，例如每個月都將大部分收入用嚟還錢，可能會影響到正常生活。第二就係利息計算方式，以同一貸款額同期數比較唔同稅貸計劃嘅成本。第三，留意合約中有冇隱藏條款同收費。記住以上要點，再同唔同銀行格價，要搵到優惠稅貸，並唔係難事。