信用卡積分直接換機票酒店抵唔抵？
更新日期: 2016 年 03 月 14 日
相信好多人都識用信用卡積分換飛行里數再換機票，最近有銀行推出咗直接用信用卡積分換機票、酒店嘅服務，表面上係慳咗兌換里數嘅手續費，實際上又係咪真係抵過換里數呢？
Citi ThankYou Rewards
只要有5,000信用卡積分就可以用，可以訂機票、酒店、租車。除咗換旅遊產品，即可以照常換禮品、現金券、現金回贈、飛行里數或酒店積分。
有得換廉航，但應該好少會用分換啩。
現有優惠
即日起至4月30日
－預訂酒店輸入折扣代碼「HOTELS」可獲85折
即日起至5月31日
－首500名兌換認可旅遊交易，可獲額外50,000積分
－8折積分兌換 (200分=$1)
－每次認可旅遊交易，自動獲得1次抽獎機會 (最多10次)，有機會贏取1,000,000積分
iGO Rewards
DBS專為MasterCard而設嘅平台，可以訂機票、酒店或自由行套票。每次預訂最少要用DBS$100，同埋要俾$50手續費，每次更改或取消預訂就要俾$250。唔夠DBS$的話，亦可以加錢換。如果用DBS Black World MasterCard訂機票、酒店，仲會有55折優惠。如果張機票個Class係可以賺到里數，用iGO Rewards換一樣可以賺里數。
一樣有得換廉航。
現有優惠
長榮航空香港來回台北經濟艙機票DBS$412起 (DBS Black World MasterCard，未連稅)。
預訂日期：即日起至11月30日
出發日期：即日起至12月31日 (不適用於23-28/3、13/7-23/8及22-26/12/2016)
兌換機票比較
我搵咗幾個目的地做例子，換唔同航空公司機票，睇下到底直接用積分換機票有冇著數。
(按圖可放大)
以東京為例，5月出發 (9號去13號回) 搭ANA，Citi ThankYou Rewards同DBS iGO Rewards所用嘅積分，換返做Asia Miles里數，都過50,000里數，比直接用里數換國泰機票用多起碼20,000里數，唔抵。至於聖誕旺季，機票自然貴，兩個服務都係跟市價，有心買旺季機票都係預早換定里數啦。換台北機票就係DBS iGO Rewards抵，因為佢做緊優惠，用價值11,333 Asia Miles里數嘅DBS$，就可以換到原本要15,000里數嘅機票，仲要係坐長榮，換得過。計埋$50手續費就分別慳咗3,667里數同$239。
搭韓亞去首爾用Citi ThankYou Rewards，平過里數換少少，DBS iGO Rewards就再平多啲。搭泰航去曼谷用DBS iGO Rewards換亦平過用里數換。不過如果你有儲開英航Executive Club嘅Avios，以上嘅短途都唔使點諗佢哋啦。
至於換返長途機，基本上用積分換都貴好多，尤其以高階艙位更甚，所以都係換返里數再換機票算喇。不過對於DBS用戶嚟講都有個好處嘅，就係本來積分換里數只係換到Asia Miles，而家可以用DBS$直接換一啲Asia Miles換唔到嘅航空公司機票。
兌換酒店住宿比較
除咗機票，比較下換酒店又如何先。我用咗3間東京嘅酒店做例子，住宿日期亦係5月9號至13號。
(按圖可放大)
如果同用里數換其中兩間平啲嘅酒店計，兩個服務都會用少咗里數。雖然Citi ThankYou Rewards有個85折優惠，不過折咗之後先至同官方價差不多。DBS iGO Rewards個積分價換返做里數，再計每里數市價$0.1，都貴過現金價。
但係Book ANA InterContinental的話，Citi ThankYou Rewards嘅85折就平咗$1,400左右，睇過其他五星級酒店都有平，想住得豪啲嘅可以留意下。