之
前介紹過八達通「好易畀」，可以由「好易畀」賬戶過數入其他人嘅「好易畀」賬戶，亦可以用NFC手機直接過數落八達通卡增值。不過入落「好易畀」賬戶要過落八達通先用到，八達通卡增值又冇得拎返現金出嚟，始終唔夠方便。最近銀通出咗JETCO Pay P2P轉賬服務，可以過數落銀行戶口，可以變返現金，大家又覺得如何？
支援大部分銀行收數
JETCO Pay支援香港好多銀行戶口收數，非銀通網絡 (匯豐、恒生) 都一樣可以，目前只有信銀國際同上海商業銀行戶口持有人先可以過數俾人，其他銀行就要遲啲。
如果收款同付款戶口都係有提供JETCO Pay入數服務 (目前即係信銀國際同上海商業銀行)，可以做到即時過數，收款人喺App一收錢，就會即時入數，其他銀行戶口就可能要兩、三日。
信銀國際同上海商業銀行戶口要下載返專用JETCO Pay App，先會有過數功能，其他銀行就可以去App Store或Google Play下載JETCO Pay P2P Collect App。
要用返銀行專用App先會有付款功能。
支援手機
－iOS 8.0 或以上
－Android 4.0 或 5.0
賬戶註冊
講下註冊合作銀行嘅JETCO Pay賬戶，我用信銀國際戶口做例子：
首先下載CITICpay App，入去同意咗條款之後，先要登入信銀國際網上理財，喺「我的網上設定」>「CITIC流動支付」撳「發送驗證碼」，就會收到驗證碼SMS。
手機收到驗證碼，返去CITICpay入返網上理財賬戶名稱同驗證碼，第一次註冊唔使剔「我已登記」。
入完就揀付款賬戶。
入連結賬戶嘅手機號碼同人哋加你入收款人名單時顯示嘅暱稱。
系統會再發一個驗證碼SMS，再入一次。
設定手機支付密碼，以後每次交易都要入呢個密，入完就完成註冊。付款戶口可以同時係收款戶口，如果想用其他戶口收款，就可以喺「我的賬戶」設定關咗「設置賬戶為收款賬戶」，裝JETCO Pay P2P Collect，設定第二個戶口收錢。不過為免混亂，我建議用兩個電話號碼或者兩部手機分別註冊俾錢同收錢戶口會好啲。
收款賬戶註冊
註冊JETCO Pay P2P Collect步驟其實差唔多：
首先都係下載JETCO Pay P2P Collect，同意條款之後入手機號碼，第一次註冊亦都唔需要剔「我已登記」
揀戶口所屬嘅銀行。
入銀行帳戶號碼同收款人名稱，收款人名稱要同銀行戶口持有人名稱一樣先入到錢。
入完電郵地址，系統就會發出驗證碼SMS，限時內要輸入。
設定埋每次交易都要輸入嘅手機PIN碼，就完成註冊。
更改銀行戶口
如果想換第二個銀行戶口收錢，可以去「我的賬戶」>「更改賬戶」，揀返戶口所屬銀行，入銀行戶口號碼同收款人名稱，收到驗證碼SMS再輸入就OK。
如何俾錢
去返CITICpay App，首先要去「管理收款人名單」，加入收款人電話號碼，最多可以加30個聯絡人，而轉賬上限係每2日$3,000，可以去網上理財調整限額，可以減少但唔可以加多。
然後就喺首頁撳「付款」，揀返要俾錢嘅朋友，撳佢個名旁邊個「付款」掣。
輸入金額同附註說明。
之後可以直接俾錢，或者加埋付款密碼，要收款人都要輸入相同密碼先可以收錢，個密碼就要你自己通知對方。一撳「確認」就會即時扣數，銀通會將筆錢保存7日，如果收款人過咗7日都唔收款，筆錢就會退返入戶口。如果入錯數目，或者發錯人，而對方又未收款的話，都可以喺「交易記錄」入面取消付款提示。
如何收錢
當人哋入數俾你，就可以喺「交易資料」睇返。
揀返要處理嘅賬項，可以選擇收款或拒絕。
揀收款，入完密碼確認之後，就會話俾你知啲錢大約幾時會入到戶口。
P2P轉賬服務比較
而家JETCO Pay加入戰團，同八達通「好易畀」、Tap&Go、TNG Wallet、WeChat Pay、BEA App i-P2P等嘅P2P轉賬服務有咩分別，請睇以下圖表。
JETCO Pay同WeChat Pay、BEA App i-P2P都可以過數入銀行戶口，WeChat Pay要經過「派利是」嘅形式過數，同埋只可以派俾WeChat好友，比較迂迴，；BEA App i-P2P亦可以做到其他銀行戶口收錢，但俾錢就只可以用東亞戶口。
喺手機控制直接由銀行戶口過數，小額金錢好似食飯飲嘢唱K睇戲夾錢，用落其實幾方便，至少唔使問人哋戶口號碼，裝個JETCO Pay，有電話號碼加返入收款人名單就得。如果將來支援JETCO Pay付款嘅銀行數量增加，除咗唔使好似我咁特登走去開個儲蓄戶口先可以付款，仲可以即時過數，唔使等兩、三日先過到數入戶口，就會更加好用。