HSBC PLUS ATM卡 V.S. HSBC VISA PLUS卡

HSBC PLUS ATM卡 V.S. HSBC VISA PLUS卡

相關信用卡:

HSBC PLUS ATM卡 V.S. HSBC VISA PLUS卡

發表日期: 2013 年 10 月 10 日 更新日期: 2013 年 10 月 10 日 生活

作者:Lady C.

話說上次Lady C.岩岩同個friend掃完轉季平貨,臨散水前就陪佢去撳番D錢「宅荷包」啦,去到滙豐ATM佢竟然喺銀包拎左張又殘又裂裂地既提款卡出嚟,「喂!放張爛卡入機,因住食卡呀!之前銀行冇寄新晶片卡比你換咩?」朋友無視我既善意提醒,大無畏咁完成左撳錢程序之後反轉佢張HSBC提款卡指比我睇,話佢係為左保住「PLUS」先唔轉新卡。

Lady C.我即時明晒,原來朋友係擔心12月歐遊(衰人冇預我!)冇張PLUS卡撳錢會好唔方便,先至一直唔啟動新果張晶片卡咋(新晶片卡轉左銀聯)!係嘅,PLUS提款卡可以喺世界各地任何一部貼有PLUS標誌既ATM提款喎,冇錯係幾方便~ 但如果換左新晶片卡(銀聯)就大獲喇……你知啦,大陸就話周街銀聯ATM姐,歐洲真係少之又少……

見離佢出發仲有一段時間,加上佢張卡又殘成咁,真係擔心佢張卡會隨時「客死異鄉」令佢撳唔倒錢,Lady C.我好想推介佢申請番張HSBC PLUS自動櫃員機晶片卡。睇番HSBC果邊既消息,好似話即日起現有銀聯自動櫃員機晶片卡客戶,可以額外申請一張PLUS呀~~

拿,為人為到底,送佛送到西,Lady C.我最多幫佢Download埋張「PLUS自動櫃員機晶片卡登記表格」喇,填+寄form佢一定識啦。搞掂晒之後,張HSBC PLUS ATM卡就會link去任何HSBC 往來戶口(即係current account)!只要喺出發前make sure個戶口有錢,到步之後就可以隨時喺有PLUS標誌既ATM撳錢喇!

不過佢咁怕麻煩,真係好可能會連表都費時填……其實佢有HSBC戶口,又有HSBC Visa卡,佢都仲可以選擇直接將銀行戶口link落佢張Visa卡度(打電話理財熱線 / 自己去分行搞),link好之後過幾日再去ATM撳錢、過數或查詢結餘就可以成功啟動附加戶口架喇。

唔知佢最後會揀邊樣呢?責任上都要提番佢,如果最後佢選擇申請HSBC VISA PLUS卡撳錢就要留意番果部ATM有冇得揀戶口,事關冇得揀戶口既提款係會當信用卡戶口現金透支架!到時就要比番現金透支手續費!

仲要留意番提款手續費呀~