上次分享咗想儲「亞洲萬里通」里數有咩必備信用卡，如果想賺現金回贈嘅話，今年又要揀邊張卡呢？今次精選咗唔同類別揀邊張卡比較好，例如海外簽賬用滙豐Visa Signature卡，隨時可以做到5.6%回贈！
零售簽賬
本地零售簽賬可以考慮安信EarnMORE銀聯卡或渣打Simply Cash Visa卡，
安信EarnMORE銀聯卡會有2%現金回贈，
渣打Simply Cash Visa卡嘅港幣簽賬會有1.5%回贈，不過會先存入網上換領平台再自行兌換，每次最少要換$50。
飲食簽賬
飲食簽賬可以揀滙豐信用卡或Citi Cash Back Visa信用卡，
滙豐信用卡登記「最紅自主獎賞」嘅「賞滋味」後會有6倍「獎賞錢」，而每$1「獎賞錢」可以當$1咁用，即係有2.4%回贈。
如果係用Visa Signature卡，會有額外3倍「獎賞錢」，即係3.6%回贈。
以Citi Cash Back Visa信用卡喺食肆簽賬會有2%回贈，酒店簽賬都同樣係2%，不過累積回贈滿$200先會存入賬戶。
網上簽賬
網上簽賬可以揀中銀i-card或建行(亞洲)eye信用卡，
中銀i-card嘅網上簽賬會有10倍積分，可以做到4%回贈，不過每月最多有額外10,000分，大概簽$1,111.11就賺到盡。
而建行(亞洲)eye信用卡網上簽賬會有5倍積分，即係2%回贈，但每年嘅額外積分上限係300,000分，即係每年簽$75,000就到上限。
超市簽賬
去超市買嘢揀Citi Rewards卡或滙豐信用卡都比較著數，
Citi Rewards卡嘅超市簽賬會有5倍積分，即係2%回贈，而生日月份有8倍積分，會係3.2%回贈。
滙豐信用卡登記咗「最紅自主獎賞」嘅「賞滋味」會有6倍「獎賞錢」，以每$1「獎賞錢」等於$1去計，即係2.4%回贈。Visa Signature卡有額外3倍「獎賞錢」，會係3.6%回贈。
海外簽賬
海外簽賬可以揀滙豐信用卡或DBS Eminent Card，
滙豐信用卡登記「最紅自主獎賞」嘅「賞世界」或「賞中華」後，海外簽賬會有6倍「獎賞錢」，加上今年嘅「最紅海外簽賬獎賞」，每階段累積簽滿$3,000後有額外5倍「獎賞錢」，即係4.4%回贈。
如果係Visa Signature卡，會有再多3倍「獎賞錢」，總共係14倍「獎賞錢」，會係5.6%回贈。
DBS Eminent Card外幣簽賬會有2%回贈，不過要揀咗「DBS$現金回贈計劃」先會自動兌換為現金回贈。
八達通自動增值
申請八達通自動增值時可以選擇安信EarnMORE銀聯卡或渣打Simply Cash Visa卡，
安信EarnMORE銀聯卡會有2%回贈，而渣打Simply Cash Visa卡係1.5%回贈。
感應式支付
平時多數拍卡畀錢就可以揀中銀i-card或建行(亞洲)eye信用卡，
中銀i-card會有10倍積分，係4%回贈，但每月上限係額外10,000分，所以簽$1,111.12左右就到上限。不過要留意，上限包括埋手機付款簽賬。
建行(亞洲)eye信用卡就會有5倍積分，即係2%回贈，不過每年大概簽$75,000就到上限。
手機付款
中銀i-card嘅手機付款簽賬會有額外積分，可以做到4%回贈，但每月大約簽$1,111.12就到上限。
網上繳費
網上繳費可以揀中信信用卡或建行(亞洲)信用卡，
中信信用卡經自動櫃員機或網上銀行繳費會有0.55%回贈，不過只限每月首$10,000。
建行(亞洲)信用卡繳費係每$1有1分，即係0.4%回贈。
| 簽賬類別 | 信用卡 | 回贈比率 |
| 零售簽賬 | 安信 EarnMORE 銀聯卡 | 2% |
| 飲食簽賬 | 滙豐 Visa Signature卡 | 3.6% |
| 網上簽賬 | 中銀 i-card | 4% |
| 超市簽賬 | Citi Rewards卡 | 3.2% |
| 海外簽賬 | 滙豐 Visa Signature卡 | 5.6% |
| 八達通 自動增值 | 安信 EarnMORE 銀聯卡 | 2% |
| 感應式支付 | 中銀i-card | 4% |
| 手機付款 | 中銀i-card | 4% |
| 網上繳費 | 中信信用卡 | 0.55% |
不過溫馨提示
1.部分信用卡只係儲積分，需要自行兌換成現金回贈或現金券
2.如有爭議，一切以銀行最終決定為準