年費恆久免 一張永留存(一)

致神奇的面書大神：

想出張永久免年費嘅信用卡，要多著數，請告訴我有何解決方法？

心急人上
------------------------

曾經諗過喺Facebook貼呢段字同朋友玩吓呢個求神遊戲，但正所謂求人不如求己，想知答案都係自己搵，既環保又快捷！

點解剩係得恒生、大新、渣打、富邦同交通銀行資料？因為我唔搵猶自可，一搵就勁勁勁勁多卡都唔收年費！呢堆卡當中我覺得唔錯值得推介申請一張「永久」傍身嘅有：

• 恒生enJoy卡(入息要求 = $48,000)：$200有$1 enJoy Dollars可以當現金用，而且都算多特選商戶可以額外賺多啲
  
  
  元氣壽司就係其中之一！Lady C.去親都落好多抹茶粉！
  
  
• 渣打WorldMiles卡(入息要求 = $60,000)：迎新送高達35,000里數或$800現金回贈，又可以於兩個月自選現金回贈類別簽賬獲享3%現金回贈！順帶一提，渣打行政人員白金信用卡都正，正在本地簽賬可獲1%現金回贈且不設上限！
  
  
• 交通銀行銀聯雙幣鑽石卡(入息要求 = $150,000)：麻煩在要連埋VISA白金卡一齊申請先可以拎到迎新禮品「 FujiFilm instax mini 8 相機禮盒套裝」，屋企有部好似係5，不過相紙堅貴！而且全港食肆高達10倍獎賞積分、海洋公園全年88折真係算實用！
  
  

推介還推介，我記得曾經喺呢度睇過一個「故事」，某間銀行某張卡以前話係「永久免年費」，之後突然寄封信比卡主話下年開始收年費。想當然，邊個會接受Forever有時間限制？如果唔係都唔會咁多失戀苦主啦！總之，冇記錯結果係投訴得直，原有卡主唔收，但新嚟就收。

(另外果啲銀行會下集出，即係挖稿坑比自己跳！)