網購額外賺3,000里數
更新日期: 2015 年 05 月 15 日
上網買嘢，大家會用網購有額外優惠嘅信用卡，賺多啲積分、里數。唔知大家有冇留意，經「亞洲萬里通」iShop連結去網上商店買嘢，都可以賺到里數，而家仲有個特別優惠，可以再賺額外里數。
優惠詳情
即日起至6月10號，經「亞洲萬里通」iShop去網上商店買嘢，除咗可以賺到基本里數，滿$80美金就額外送200里數，即係大約$3.1/里數；滿$300美金就送額外1,000里數，即係大約$2.325/里數，優惠期內可賺額外里數上限係3,000里數。
當中有唔少香港人熟悉嘅商戶，例如Apple Store、iTunes Hong Kong、Microsoft Store Hong Kong、YesAsia.com HK、樂天(日本)、Gmarket(韓國)等等。
賺額外里數方法
要賺額外里數，首先登入「亞洲萬里通」iShop，然後就揀你要去買嘢嘅網站，撳「立即購物」，就會自動跳去嗰個購物網站，然後就照常買嘢。
撳商戶下面嘅「立即購物」，就可以去返網上商店買嘢。
完成交易之後5日內，應該會收到Asia Miles發嘅交易確認電郵，Logiin iShop亦可以喺「iShop交易紀錄」睇返。如果收唔到電郵或睇唔到紀錄，就要喺完成付款後5至10日內提出補發里數申請。商戶將會喺120日內驗證交易，確認之後會收到Asia Miles發嘅電郵通知，里數就會喺確認後30日內存入戶口。如果中間收唔到驗證交易電郵，或者里數喺30日內仲未入數，亦都要向Asia Miles申請補發。
賺額外里數注意事項
為咗確保經「亞洲萬里通」iShop去網上商店買嘢可以賺到里數，要留意以下幾點：
－記得開瀏覽器容許Cookies存取嘅設定。
－記得要經「亞洲萬里通」iShop網頁上嘅商戶連結去購物網站，唔好開一個新Browser視窗或Tab直接入網址或撳Bookmark。
－經「亞洲萬里通」iShop網頁開咗商戶連結後，盡快完成購物程序。
－如果Check Out俾錢時，想再加其他嘢，就要關咗個Page，重新經「亞洲萬里通」iShop再開一次商戶網頁。
賺里數攻略
假設我去Microsoft Store Hong Kong買一部$3,888嘅Surface 3 64GB，經「亞洲萬里通」iShop入去，每$1美金可賺1里數。再用唔同信用卡，計下一共可以賺到幾多里數。
Asia Miles
基本里數：501里數 ($3,888約為$501美金)
額外里數：1,000里數
合共：1,501里數
建行(亞洲)eye卡
獎賞：網上零售交易5X積分
可賺獎賞：19,440分
15分=1 Asia Miles里數
兌換里數：1,296里數
兌換里數手續費：最低$100，最高$300
總賺里數：2,797里數
中銀i-card
獎賞：網購10X積分 (每月上限額外10,000分)
可賺獎賞：3,888基本積分 + 10,000額外積分 = 13,888分
15分=1 Asia Miles里數
兌換里數：925里數
兌換里數手續費：最低$100，最高$300
總賺里數：2,426里數
東亞Flyer Wolrd萬事達卡
獎賞：1.6X積分
可賺獎賞：6,220分
$5=8分=1 Asia Miles里數
兌換里數：777里數
兌換里數手續費：豁免
總賺里數：2,278里數
經過一輪計算，建行(亞洲)eye卡網購5X積分係比較抵，雖然中銀i-card有10X，但每月額外積分上限只有10,000分，即係簽大約$1111就賺晒，比較啱用嚟賺$80美金嗰200里數。另外東亞Flyer Wolrd萬事達卡免兌換里數手續費，積分有效期亦有60個月，可以慢慢儲。