​旅遊網訂酒店賺里數

平時用信用卡訂機票有積分，同埋賺到航空公司飛行哩數計劃嘅里數。而有啲旅遊網站就同Asia Miles合作，訂酒店一樣可以賺里數，照賺埋信用卡積分，換機票就更加快啦。

選擇旅遊網站除咗睇佢可以賺到幾多里數，重要注意以下各點：
－房價：同一間酒店，同一個房型，每個網站標價可能會有少許分別，自然要格下價。
－手續費：每個網站都會收訂房手續費，某個網房價最平，但加埋手續費可能就唔係最平。
－訂房步驟：每個網站嘅訂房賺里數步驟未必一樣，例如Agoda要經指定網頁Link訂；Ctrip就要用Asia Miles戶口號碼開個Account，訂房時再入埋「AML」呢個優惠碼，所以要睇清楚，唔係訂咗房隨時冇里數賺。
－入住：部分網站限定Asia Miles會員本人訂房同入住先有里數，例如Agoda。
－獲取里數時間：通常喺訂房同成功入住之後兩個月內，就會收到里數。
－其他優惠共用：有啲網站會有其他折扣優惠，但要留意，有時賺咗里數，就冇得賺優惠，例如Agoda要經Asia Miles指定Link訂賺里數，用DBS信用卡折扣亦係要經特別Link訂，兩者就唔可以同時賺。
－外幣例如美元訂房，要計信用卡公司匯價，銀行會收外幣交易手續費，最終房價可能貴過港幣。

今次我抽咗幾個旅遊網站出嚟，首先睇下佢哋可以賺幾多里數。以下個表假設訂東京京王廣場酒店 (Keio Plaza Hotel) 標準雙人房 (Standard Double），2015年1月8號至11號共3晚。


由以上數據同計算睇嚟，Agoda個價係最平，但里數亦最少。Kaligo所賺里數多啲，價錢貴一截，雖然條數計出嚟係Kaligo賺里數抵啲，以慳旅費角度嚟講，都係揀PointsHound抵啲，同Agoda差不多價錢，里數就多一倍以上。不過PointsHound可以揀用美元同港幣顯示價錢，可賺里數會唔同咗，港幣會少100里數。當然，其他旅遊網都會有特價優惠，例如房價半價、連住三晚免一晚錢之類，吸引力可能會高過賺里數，大家就自己衡量下邊個抵啲啦。

Agoda可賺KrisFlyer
Agoda除咗可以每$10賺1Asia Miles里數，亦可以每$1美元賺1.5 KrisFlyer里數 (都係要經指定Link訂)，出年1月18號前訂，4月30號前入住，可以賺雙倍KrisFlyer里數。

Kaligo、PointsHound多種飛行哩數計劃
Kaligo同PointsHound都會喺揀房嗰陣列明會賺到幾多里數，唔使靠估。如果你想賺Asia Miles以外嘅里數，Kaligo有美航AAdvantage、Air Asia BIG；PointsHound就有AAdvantage、法航 / KLM Flying Blue、Jet Airways JPMiles、維珍Flying Club等等。

Rocketmiles賺Avios
另外Rocketmiles亦係一個可以選擇唔同飛行哩數計劃嘅旅遊網，雖然佢冇得賺Asia Miles，但有AAdvantage、英航Executive Club (Avios)、MileagePlus，有時個別酒店會有額外里數，想儲Avios可以留意下。
[2015/3/6更新] Rocketmiles而家都可以賺Asia Miles，訂房每晚可賺500-5,000里數。

Ctrip專訂大陸酒店
相信去開大陸玩嘅人，都會知道Ctrip攜程旅游網，大城市嘅大酒店喺其他旅遊網都可以訂到，但要搵一啲較平較細間嘅都可以搵得到。而佢收國際信用卡，亦比較方便香港人，不過手續費自然要俾多少少。不過訂外國酒店入Asia Miles優惠碼，會話唔適用，訂大陸酒店就用到。

Expedia到底有冇里數賺？
最近Expedia宣傳話自己做緊Promotion，消費$10可賺2里數，我11月12號打去Hotline諗住問詳情，點知CS竟然答我話呢個優惠喺11月7號已經完咗@@！11月17號再打去，得到一樣嘅答案，只係話網頁個廣告未移除，而佢Facebook專頁仍然將呢個優惠Post Pin住置頂。咁到底係咩一回事呢？

信用卡優惠
除咗賺里數，亦可以賺埋信用卡優惠：
恒生：港幣旅遊類簽賬3X Cash Dollars。(詳情) 星期六、日Agoda單一簽賬滿$10,000或以上，可賺額外$400 Cash Dollars。(詳情)
建行 (亞洲) eye Visa卡：網上簽賬5X積分，「賞即飛天地」旅遊類3X，一共7X。(詳情)
DBS Eminent卡/白金卡：網上外幣簽賬3%現金回贈。(詳情)
Citi Clear Card：網上外幣簽賬2%現金回贈。(詳情)