上星期Samsung宣佈Samsung Pay登陸香港，部分Samsung手機用戶可以登記優先體驗計劃，率先試用。上次喺記者會睇過示範，今次特別搵咗部Samsung手機返嚟，就同大家實測下，睇下用起上嚟夠唔夠方便。至於Samsung Pay嘅基本資料，可以參考返呢篇Blog。
安裝Samsung Pay
要用Samsung Pay，首先要更新咗系統先。以Galaxy S7為例，首先入去手機設定，揀「軟件更新」>「手動下載更新」，更新到最新版本就可以用到。要留意更新前最好充滿電，更新過程中唔好用手機或者熄機，畀啲耐性，等佢慢慢更新完。
要將手機系統更新到最新版本先用到Samsung Pay。
加入三星賬戶
未開始用Samsung Pay之前，首先要登入咗三星賬戶，同埋登記Samsung Pay優先體驗計劃。如果未登記同登入三星賬戶，就算開咗Samsung Pay App，都只係會見到介紹資料。
首先去「設定」>「雲端與帳戶」>「帳戶」>「加入帳戶」>「三星帳戶」。
輸入三星帳戶登入電郵地址或電話號碼同密碼，睇埋條款及細則之後撳「同意」。
第一次打開Samsung Pay，就可以安裝Samsung Pay更新，裝完之後就正式開始設定。
設定指模認證及PIN密碼
Samsung Pay支援指紋認證，如果之前冇設定指紋解鎖認證，就可以設定咗先，基本上跟指示做，按幾次指模就得。
註冊完指模，就設定埋Samsung Pay專用嘅4位數字PIN密碼，之後就可以加入信用卡。
加入信用卡
加卡可以直接影卡面資料，或者手動輸入信用卡號碼、卡主姓名、有效日期、CVV碼等。
影信用卡面資料，就會自動入返資料，按下面可以手動輸入。
進行信用卡認證，可以經手機短訊拎驗證碼或直接打去銀行確認。如果經短訊認證，可能要幾分鐘先收到短訊。
收到短訊之後入返驗證碼。
簽返信用卡上面嘅簽名，如果舖頭要求出示簽名，可以俾佢睇返。
簽完名就完成加卡。
付款步驟
買嘢畀錢時只要打開Samsung Pay，做指模認證或入PIN密碼，就可以拍機。
畫面底部會見到Samsung Pay卡邊，向上拉就會打開。
見到卡之後可以左右掃揀卡。
做指模認證或入PIN密碼之後，就有30秒時間做交易。
第一種交易方式－拍機落NFC感應器。
第二種交易方式－拍埋去碌卡卡槽，可能要稍為郁下，對啱磁場感應。
喺Samsung Pay App入面可以睇返交易記錄。
喺Samsung Pay入面可以設定喺邊個畫面可以直接用。
預設付款
如果本身有用開Android Pay，想將Samsung Pay設定為預設付款App，可以係「設定」>「連接」>「NFC與付款」>「輕觸並付款」揀Samsung Pay。如果仍然想用返Android Pay，喺下面「如果開啟應用程式支援輕觸並付款」就要設定為「使用開啟的應用程式而非Samsung Pay」，咁畀錢時開咗Android Pay先，就可以照用。
另外，喺右上角功能表「預設NFC方式」可以設定為「自動選擇」。
將Samsung Pay設定為預設付款服務。
遙距鎖機
萬一唔見咗電話，可以用「尋找我的手機」遙距鎖上手機同Samsung Pay，或者刪除手機同Samsung Pay所有資料，避免被人盜用。當然，要用呢個功能，記得要喺手機嘅「安全性」>「尋找我的手機」設定入面開返「遠端控制」。當然，唔見咗手機之後要儘快趁未熄機 / 未離線之前用「尋找我的手機」鎖機。
用三星帳戶登入「尋找我的手機」就可以遙距鎖機。
限時優惠：
【經HongKongCard成功申請DBS Eminent Card享高達$1000現金獎賞及$200額外獎賞】
https://www.hongkongcard.com/s/ENi1L
【經HongKongCard申請美國運通I.T Cashback卡，可額外獲贈$200禮券】
https://www.hongkongcard.com/s/b4JeP
【經HongKongCard申請WeWa卡，額外享$200現金回贈】
https://www.hongkongcard.com/s/mwPcT