想當年，我仲係小朋友嗰陣，同屋企人去食飯，見到Uncle拎張金卡出嚟埋單，感覺好威水；中學時仲有啲同學仔會擺屋企人啲過期金卡喺銀包懶型咁，都唔知為乜。但係時至今日，金卡已經開始被淘汰，白金卡都係基本，就連Visa Signature卡開始有普及化嘅跡象，申請門欖仲愈來愈低，出卡愈來愈易。今次就同大家介紹返新嘅Visa Signature卡有咩特色，比較下邊張好用啲。
Visa Signature卡有乜好？
Visa Signature卡嘅定位比白金卡高級，除咗可以享受到Visa白金卡嘅優惠，例如：
－禮賓服務預訂機票、酒店、餐廳、租車、活動門票、旅遊諮詢
－廿四小時緊急服務 (信用卡報失、補發新卡、緊急預借現金)
－餐飲、購物、住宿、交通、娛樂優惠
仲有多啲優惠，例如指定餐廳套餐買一送一係要Visa Signature卡或以上級別先有；而銀行俾Visa Signature卡嘅優惠都會比白金卡多。
新出Visa Signature卡
最近東亞同中銀都出咗新嘅Visa Signature卡，睇下基本資料先：
東亞銀行Visa Signature卡
基本資料
－年薪要求：$240,000或以上 (暫時只限受邀請客戶申請)
－基本簽賬：$1=1分
－25,000分換$100現金券 / 現金回贈
－積分有效期：5年
－本地食肆簽賬6X積分
－海外簽賬4X積分
－免費7日家庭旅遊保險 (2017年1月1日起，每年簽賬滿$60,000有1次、$90,000有2次)
－酒店優惠 (至2017年12月31日，包括房價額外95折、房間升級、提早Check-in / 延遲Check-out)
－MCL、UA、星影匯正價戲票9折
呢張卡主打本地食肆同海外簽賬，分別有6X同4X積分，海外簽賬包括網上外幣同DCC簽賬。不過比較可惜嘅係，呢張卡冇得換里數，只可以換現金券。雖然呢張卡年薪要求只要$240,000，同DBS Eminent Card算係入場門最低，不過而家佢仲未有得公開申請，只限受邀請嘅客戶申請。
中銀旅遊賞Visa Signature卡
基本資料
－年薪要求：$300,000或以上
－基本簽賬：$1=1分
－15分換1 Asia Miles里數
－25,000分換$100現金券
－積分有效期：2年
－海外簽賬8%額外現金回贈 (該月本地零售簽賬3次或以上，海外簽賬單一簽賬滿$500及累積滿$6,000，每月額外回贈上限$500)
－於中銀集團保險指定網頁成功投保旅遊"易"綜合保，可獲8折保費優惠及8X積分
睇個名都知係針對海外簽賬，不過佢係送8%現金回贈，不過首先要本地簽3次，呢個唔難，海外每單要簽$500或以上，累積夠$6,000先會計數。
Visa Signature卡迎新比較
兩張比較新嘅Visa Signature卡，只有中銀旅遊賞Visa Signature卡有迎新禮品，至於其他Visa Signature卡迎新禮品就可以參考以下個表。除咗匯豐Visa Signature卡同DBS Eminent Card，其他Visa Signature卡迎新只限全新客戶。
匯豐Visa Signature卡同DBS Eminent Card現有客戶迎新如下：
匯豐Visa Signature卡
首2個月累積簽賬$6,000
－以$700換購Nescafe Dolce Gusto Stelia全自動咖啡機或
－$400惠康超級市場禮券或
－$300「獎賞錢」
－額外2%「獎賞錢」回贈，每月簽賬上限$2,000
DBS Eminent Card
每月累積簽賬滿$5,000，網上及海外簽賬額外4%回贈，每月額外回贈上限$100，合共$400。
想儲里數可以考慮Citi PremierMile信用卡，$1.5=1里，賺盡20,000里數，冇最低簽賬要求，簽幾多賺幾多，不過呢個優惠就完，唔知之後會唔會繼續。匯豐可以揀「獎賞錢」做迎新禮品，以全新客戶計，加埋網上交易額外2%「獎賞錢」，賺盡$640「獎賞錢」，可以換到6,400里數。
至於現金回贈，DBS Eminent Card網上及海外簽賬回贈額外4%回贈，賺盡$800，亦可以揀直接回$600。想要現金券，都有Citi PremierMile信用卡$800麥當勞美食券 (如果你食到咁多餐麥記)，又或者匯豐Visa Signature卡$500惠康超市現金券，似乎實際啲。
Visa Signature卡資料比較
以下列咗幾間銀行Visa Signature卡資料出嚟，方便大家比較：
海外簽賬－Citi PremierMiles信用卡 / 中銀旅遊賞Visa Signature卡 / DBS Eminent Card
要賺里數嘅話，Citi PremierMiles信用卡$4=1里，當月簽夠$20,000 (本地同海外簽賬)，海外簽賬就會去到$3=1里數，去外國瘋買喪食就啱晒，網上外幣簽賬一樣計。唔好唔記得佢仲可以玩Avios、KrisFlyer里數、酒店積分。
如果想要現金回贈，之前DBS Eminent Card 6%都幾好用，不過中銀旅遊賞Visa Signature卡有8%，雖然佢要要簽夠$6,000 (比DBS Eminent Card簽多$1,000)，每單又要$500或以上，仲要加埋本地簽賬3次 (冇最低簽賬額要求)，條件係多啲，但每個月可以回$500，其實都OK嘅。
飲食簽賬－匯豐Visa Signature卡
匯豐Visa Signature卡一直都係食飯卡首選，因為「最紅自主獎賞」額外5X「獎賞錢」加上Visa Signature卡額外3X「獎賞錢」，一共9X，儲里數做到$2.78=1里數，冇邊張卡夠佢儲得多。同埋「最紅自主獎賞」延期到出年，可以繼續食。不過大家會唔會轉其他類別呢？
DBS Eminent Card食肆簽賬有3X DBS$，佢DBS$60=1,000里數，計返都有$5=1里數。
東亞銀行Visa Signature卡6X積分，計返都有大約2.4%回贈比率，但就唔夠匯豐Visa Signature卡9X有3.6%多。
網上簽賬－DBS Eminent Card
經常幫襯本地網站，DBS Eminent Card 嘅網上及海外簽賬6%回贈都係最好賺，如果係買外國嘢多，Citi PremierMiles信用卡海外外幣簽賬包括網購，都可以考慮。
日常購物－匯豐Visa Signature卡
由於有「最紅自主獎賞」類別額外3X「獎賞錢」加持，匯豐Visa Signature卡都有1.6%回贈，但換里數就唔係特別抵，因為有唔少卡都做到$6=1里數。
中銀恒地會Visa Signature卡可以用18,000分換$100現金券，比起其他卡要25,000分抵少少，可惜佢冇特別簽賬倍數。
Visa Signature卡替代
當然，除咗Visa Signature卡，仲有唔少卡都有簽賬倍數獎賞。夾埋其他類型嘅卡，喺唔同簽賬類別嘅用卡編排上靈活啲。又或者唔夠年薪申請某一兩張Visa Signature卡，都可以作為替補。
Citi Rewards Card
超市、百貨公司、電訊服務5X積分
里數：$3=1里數
回贈比率：2%
渣打亞洲萬里通萬事達卡
食肆、網上、海外簽賬
里數：$4=1里數
信銀國際motion卡
MasterCard Contactless (PayPass)、網上簽賬額外5%現金回贈
回贈比率：5.55%
例如有Citi Rewards Card喺超市、百貨公司、電訊服務簽賬、又或者用信銀國際motion卡去便利店、超市拍卡交易，匯豐Visa Signature卡就可以繼續做食飯卡。
又或者用渣打亞洲萬里通萬事達卡食飯、海外簽賬集中落Citi PremierMiles信用卡，簽過$20,000就有$3=1里數，或者將匯豐Visa Signature卡Set做6X「賞世界」，海外簽賬再去到$2.78=1里數。