過數銀行戶口套現 八達通好易畀新玩法

過數銀行戶口套現 八達通好易畀新玩法

相關信用卡:

過數銀行戶口套現 八達通好易畀新玩法

發表日期: 2016 年 11 月 22 日 更新日期: 2016 年 11 月 22 日 購物銀行戶口理財戶口

作者:積克

今年5月八達通出咗「好易畀」(O! ePay),可以做P2P轉賬,由「好易畀」賬戶過數入其他人嘅「好易畀」賬戶,亦可以用NFC手機直接過數落八達通卡增值。最近佢加入咗新功能,可以喺銀行戶口同「好易畀」戶口之間過數,咁以後食完飯,人哋夾返錢俾你,就可以入落銀行套現,唔使焗住入落八達通嘟晒佢。

新版本除咗有新功能,介面亦有改動,不過原有嘅功能,例如「P2P收錢」、「P2P畀錢」、「好易畀」戶口同八達通之間轉出、轉入等功能大致相同。
基本資料可以睇返之前篇Blog

喺主畫面撳左下角「+」號,可以揀過數動作。

「P2P收錢」同之前差不多,可以揀向一人或多人 (不同或相同金額、平分賬單)。

「P2P畀錢」可以向指定「好易畀」過數。

「轉出」同「轉入」都係開咗NFC之後,入銀碼然後拍八達通卡就可以過數。

新會員級別
新版本「好易畀」會員分咗3個級別,開戶成為普通會員 (Lite),就可以喺「好易畀」戶口或八達通之間過數,申請年齡亦下降到12歲。要喺「好易畀」同銀行戶口之間過數,就要升級為Plus會員,要用身份證登記,「好易畀」戶口結餘同全年過數金額多會加大。如果係渣打存款戶口客戶就可以經網上理財升級為Pro,全年交易限額冇上限,經渣打戶口仲可以做到即時過數。

戶口等級

已經申請咗「好易畀」戶口嘅渣打客戶,會收到Email話自動升級為Pro,仲有$10送。

申請戶口步驟
1. 如果之前未申請過「好易畀」戶口,就可以撳「登記」。

2. 睇完條款冇問題,就可以撳「同意」。

3. 用手機號碼同電郵地址登記。

4. 設定賬戶名稱同密碼,然後撳「要求啟動編碼」,之後就會收到啟動編碼SMS,入返就可以去下一步。

5. 去返登記電郵,撳返Email入面連結確認電郵地址,返去App入面撳「下一步」就完成開戶。

6. 如果要升級做Plus會員,可以撳「升級」。

7. 入返身份證上嘅姓名、出生日期、性別、國籍、身份證號碼,再影埋身份證正面上傳上去,一般喺3個工作天內完成申請處理。

銀行戶口過數
如果冇渣打戶口,都可以登記一個銀行戶口過數,大約需要兩星期完成銀行直接付款授權。要留意每人只可喺「好易畀」登記1個銀行戶口,如果要換就要取消咗同第一個銀行戶口嘅連結。

由「好易畀」轉錢去銀行,2個工作天後就會收到;每次$500起,每天最多1次。
由銀行轉錢去「好易畀」,工作日下晝3點前發出,2個工作天後就會收到;每次$300至$1,000,每日1次。不過轉錢去銀行一個月內超過$5,000,就會收取超過金額嘅0.5%作為手續費。

喺主介面撳左上角頭像入去「我的資料」,喺入面可以見到戶口資料,

撳右上角「個人資料及設定」可以修改個人資料有「銀行轉賬設定」,可以登記、刪除或更改轉賬銀行戶口。

登記轉賬戶口要喺「銀行轉賬設定」揀銀行同入戶口號碼,戶口必須同名。

喺設定入面可以Set每日交易限額。

新功能應用
除咗原有「好易畀」戶口之間「P2P畀錢」同「P2P收錢」,喺「轉出」同「轉入」版面可以搵到銀行過數功能,另外仲有網上付款功能:

「轉出」:由「好易畀」戶口轉去八達通 / 銀行戶口。

「轉入」:由八達通 / 銀行戶口 / 便利店轉去「好易畀」戶口。

「網上付款」:指定網上商戶付款,如果買嘢退錢,3至5個工作天會入返「好易畀」戶口。

網購埋單時可以揀用八達通網上付款,如果係桌面網頁版,可以揀掃描QR Code或入付款編號。

手機版網頁揀完用八達通埋單,再揀「好易畀」。

暫時支援「好易畀」嘅網站有:24 Cards、339到家、2000Fun OpenShop網上商城、Cinema City、dds Lifestyle、EClubStore、Gameone、MillionDEAL.biz、Magical World奇幻館、香港青年協會、maple、八達通網上商店、香港紅十字會、天然、智冠科技 (香港)、Strawberrynet、ticketflap、東華三院、WhatsMall。

新登記免費送$10
而家新登記「好易畀」賬戶,會有獎賞,喺11月16號或之前未登記過,又喺12月31日或之前成功登記,同埋同另一個「好易畀」用戶加入朋友,就會有$10現金獎賞,每人可賺1次。名額200,000個,先到先得。