越沖越污糟咁恐怖？消委會沐浴產品測試報告懶人包

早幾日消費者委員會出咗個測試報告，測試咗市面上60款沐浴產品，進行化學、微生物同埋防腐效能嘅測試。其中發現有23款測出可致敏防腐劑，其中一款嘅菌落總數更超過標準上限169倍！真係聽到都嚇到個心離一離啊！咁咪洗白白反而仲污糟囉？成個測試報告有10版，冇心機睇咁多嘅，可以睇吓呢個懶人包！

MIT和CMIT含量

MIT(Methylisothiazolinone)及CMIT(methylchloroisothiazolinone)係常見於化妝品嘅防腐劑，佢哋可能令部份人士產生敏感反應。可能有人會問，既然防腐劑有機會令人致敏，咁點解仲要加落去呢？添加防腐劑係為咗防止產品滋生細菌，所以係有需要嘅，正確咁使用都可以保障到消費者。各國都會對呢2隻物質嘅使用有規定，內地以及歐盟規定化妝品嘅MIT濃度上限為0.01%，而CMIT/MIT混合物嘅上限則為0.0015%。歐盟今年4月提出修訂建議，建議MIT只可以用喺沖洗產品，濃度最高係0.0015%，進一步保障消費者嘅安全。

喺測試嘅樣本入面，有23款有MIT及/或CMIT，含量都符合內地以及歐盟嘅規定。不過如果參考歐盟消費者安全科學委員會SCCS建議嘅MIT最高安全濃度0.0015%的話，有9款樣本嘅MIT濃度就高於呢個建議標準，有機會引起接觸性過敏。
 

游離甲醛含量

相信大家都聽過甲醛呢個名字，尤其喺啲油漆廣告入面都會話標明冇甲醛。甲醛係俾美國接觸性皮膚炎協會列為2015年嘅年度致敏物質。甲醛(Formaldehyde)係一隻冇色氣體，唔少人會對呢種物質產生刺激反應。有研究指化妝品中嘅游離甲醛(free formaldehyde)水平如果去到0.02%至0.03%，短期使用都有可能引致正常皮膚出現皮膚炎。當中有7款樣本檢出游離甲醛，有唔少都高於0.03%。內地以及歐盟規定如產品高於0.05%，包裝必需標示「含甲醛」，不過測試樣本中高於0.05%甲醛嘅產品都冇標示「含甲醛」。

甲醛濃度高於0.05%之產品：

化妝品常見可釋出甲醛成份：

• Diazolidinyl urea
• DMDM hydantoin
• Quaternium-15
• Sodium hydroxymethylglycinate
• 2-bromo-2-nitropropane-1,3-diol
• 5-bromo-5-nitro-1,3-dioxane
• Benzylhemiformal
• Imidazolidinyl urea

二噁烷(1,4-dioxane)含量

今次嘅測試仲有檢測二噁烷嘅含量。雖然二噁烷並唔係化妝品嘅原材料，不過喺生產過程入面，可能會因為化學反應而令樣本檢測到呢種物質。根據國家食品藥品監督管理局嘅規定，化妝品入面嘅二噁烷最高限值為30毫克/公斤(或ppm)。而根據歐盟SCCS建議，化妝品中嘅二噁烷含量低至10ppm或以下屬安全。今次測試嘅樣本有33款檢測到有二噁烷，不過全部符合內地嘅規定，係有其中3款含量超過SCCS嘅建議含量：
 

因為皮膚接觸沐浴產品只係短時間，而且會沖洗走，喺正常使用情況下，樣本中嘅二噁烷含量唔會危害消費者健康。

沐浴露有菌，越洗越污糟？

其中一款檢出菌落總數以及霉菌酵母菌總數超標。雖然冇檢測出致病菌，不過759阿信屋太陽花清爽沐浴露檢出嘅菌落數量超過標準上限169倍，而霉菌及酵母菌總數比標準上限高28倍。導致呢個結果嘅原因可能係因為防腐劑不足或者失效，因為標籤上面寫有添加CMIT及MIT防腐成份，但檢測時郤未有檢出。

用咗有菌嘅沐浴露到底有咩影響？咁樣即係同搽細菌上身無異，雖然會係沖洗走，不過仍然會增加皮膚受感染嘅機會，尤其掂到黏膜位置如眼睛等都會增加感染風險。
 

▲報告出咗之後，759阿信屋已經即刻道歉。買咗產品嘅市民可以拎番產品去任何「759阿信屋」去做退款手續。

點樣揀隻沖得安心嘅沐浴產品呢？

沖涼應該係每日最放鬆嘅時刻，冇理由會想隻沐浴產品搞到自己唔舒服㗎！想揀隻安心嘅沐浴產品，咁就要睇吓以下嘅貼士喇：

1.消委會就建議皮膚容易過敏或患有濕疹嘅人士，喺選擇沐浴產品時避免用含MIT或CMIT以及游離甲醛嘅產品。除咗以上物質，亦要留意可能有其他成份可能會致敏和刺激皮膚，包括SLS(sodium lauryl sulfate)、SLES(sodium laureth sulfate)、香料(fragrance allergens)、防腐劑如對羥基苯甲酸酯類(parabens)及苯氧乙醇(phenoxyethanol)。
2. 除咗留意成份，亦都要留意產品嘅生產日期、有效日期以及開封後使用期等。因為產品嘅品質只會喺某一段時間係維持得最好，所以記得要留意相關資料啊！喺選擇產品時盡量都選擇番有標示使用期嘅保護自己。
3. 要細心以及有耐性記錄低自己敏感嘅物質。講真有時唔試過真係唔知自己會敏感㗎嘛！當咁不幸遇上敏感嘅情況時，要冷靜諗番近期有冇接觸過啲新嘅產品，如果有嘅話，睇睇個產品嘅成份有啲咩係可能致敏。記低佢，咁下次就可以避免喇！有時有啲產品亦都冇列明詳細嘅成份，遇上敏感嘅情況唯有成個產品記起。
4. 勿過份依賴產品嘅宣傳字句。即使產品聲稱「性質溫和」、「經過皮膚敏感測試」等，都唔代表產品冇致敏物質，所以最好都係睇番成份列表選擇產品。
5. 天然成份並唔等於一定唔敏感。有啲人會認為用天然成份就唔會敏感，其實有啲天然或草本成份依然會令皮膚敏感，所以唔好有錯覺越「天然」越好啊！

濕疹皮膚仲有咩要注意？

最後自己額外俾啲小貼士大家，濕疹皮膚除咗要小心揀隻唔會敏感以及令皮膚乾燥嘅淋浴產品外，有啲習慣都要留意嘅：

1. 沖涼時間唔好太長，水溫亦要適中
2. 沖涼時亦唔好用毛巾或者海綿大力咁捽啲皮膚
3. 要經常使用潤膚露保持肌膚滋潤
4. 避免使用或食用會引起敏感反應嘅物品及食物
5. 保持家居清潔，減少致敏源

總括來講，選擇沐浴產品時最重要都係留意番成份，唔好過份相信產品標榜嘅語句，揀隻自己唔會敏感嘅沐浴產品，亦希望生產商可以令產品標籤更加清晰，方便消費者選擇啦！

由即日起至2016年8月31日，客戶於萬寧以具備Visa payWave或萬事達卡感應式付款功能的實體匯豐卓越理財信用卡、匯豐運籌理財白金Visa卡、匯豐Visa Signature卡及匯豐白金Visa卡作單一感應式付款功能交易滿港幣500元或以上，可享即時獲贈港幣10元現金優惠券！

優惠詳情可以去<呢度>睇番。