盛放日期更新 嚴選日本賞櫻勝地

踏入3月，日本賞櫻熱潮來了。日本氣象株式會社喺3月9日更新咗，日本各地城巿櫻花最盛放的確切日期，東京為3月22日，比九州福岡的24日仲要早，而名古屋係28日，大阪係31日，東北的仙台則係4月4日。呢幾個城巿適合賞櫻的地點唔少，依家就各城巿精選一個出嚟，介紹畀大家。

 

 

關東 – 東京都（3月22日）

 

東京都人口多，賞櫻公園都多，包括千鳥淵綠道、目黑川、六本木東京中城等，各有特色，但如果想喺櫻花下感受日本古代氣息，咁就要去小石川後樂園。呢到曾經係水戶德川家建的回遊式築山泉水庭園，依家係日本著名古蹟，櫻花樹分布喺小橋流水周圍，非常清幽。

 

 

位置：東京都文京區後楽１-6-6

交通：鐵路飯田橋站，步行約8分鐘

 

 

九洲- 福岡（3月24日）

 

福岡巿最有名的賞櫻公園係舞鶴公園，內裏種有千棵櫻花樹。每年花期，福岡城都會搞櫻花祭，有嘢食有嘢買之餘，晚上6時厔10時仲係夜櫻亮燈時間。此外，呢個公園的牡丹，藤，杜鵑，芍藥，蓮花，山茶花，菖蒲花等，會按季而開，一年四季都有值得欣賞之處。

 

 

位置：福岡市中央區城内1-4

交通：地鐵空港線大濠公園站，5號出口徒歩約5分鐘

 

 

中部地方 - 名古屋（3月28日）

 

巿內從山崎川的石川橋走到新瑞橋的2.8公里距離，係日本櫻花名所百選之一，緣川種咗數百棵櫻花樹，抬頭欣賞櫻花，聽住潺潺流水聲，感覺唔係其他賞櫻公園可以畀到。

 

 

位置：愛知縣名古屋市瑞穂區

交通：地鐵櫻通線瑞穂區役所站行15分鐘

 

 

關西 - 大阪（3月31日）

 

大阪城係羽柴秀吉喺大致統一日本時所建，金碧煇煌，廣大宏偉，本來就係大阪最重要的旅遊景點。而大阪城公園正正包圍大阪城，園內有4,300棵櫻花樹，喺公園櫻花樹下觀賞大阪城，相信係全大阪最美的景色。

 

 

位置：大阪府大阪市中央區大阪城３−１１

交通： JR大阪城公園車站

 

 

東北地方- 仙台巿（4月4日）

 

仙台巿三神峯公園，係全巿最多櫻花樹的公園，最大特點係公園有個大草地，好多日本人都會帶一家大細嚟野餐賞櫻。如果你都想舒舒服服坐低賞櫻，呢度啱晒你。

 

 

位置：宮城縣仙台巿太白區

交通：地鐵南北線長町南站行約23分鐘