特首，同你計計數先

早兩日特首發表任內第三份《施政匯報》。《施政匯報》係梁生自己發明，前兩任特首都無做過。今次的內容除了將「維園花卉展入場人次近60萬，打破過往紀錄」同「康文署博物館2014年入場人次逾652萬」列作政績外，當然有佢一向主打的房屋問題。

由於資助出售房屋可以用居屋、又或用市建局單位以優惠價出售，有位走盞，好易夠數，就用公屋落成量同佢計計數。

第一份《施政匯報》第十五頁話：「已向房委會提供足夠土地，於2012-13至2016-17年度的5年內共興建79,000個公屋單位」，跟據房委會，2012至2015三個年度，公屋實質落成量總數有37109個，而據房屋署6月1 日更新的「公營房屋預測建屋量」，2015至2017兩個年度預計有 35400個公屋落成，兩者加埋有72509個，比佢大計少8%。

千萬別當他傻，完成唔到你咬佢？賭完第一次白頭片會上癮，一年之後第二份《施政匯報》話：「2014年1月，宣布以47萬個單位作為未來十年的總房屋供應目標，當中公營房屋佔六成，包括約20萬個公屋單位」，即是說每年平均要建成20000個公屋單位，用上述房屋署的預測，2014-2019年五個年度年均建成15420個單位，總數77,100個，即是說2019-2020年度起的5年總共要起122,900，年均24580個方可夠數。

如果吹大咗點算？零份重作。房委會6月12日公布了2015-2020年的「公營房屋建設計劃」，特首亦有加入第三份《施政匯報》：「在2015-20年度的5年期內，房委會將會興建合共約93,100個公營房屋單位，包括約75,500個公屋單位。」今次嘅建屋量相當合理，好大機會可以完成。況且一年推一個數字出來，你記得幾多。

最後做個總結，我5歲開給留意公營房屋不足問題，而呢個問題又源於香港根深柢固的土地問題，加上議會無日無之拉布。我已經責成有關部門全力跟進，不過要等埋發叔先開會。