母親節 V.S 父親節

剛剛送走了母親節，又是時候想想父親節的安排了。正所謂「家家有本難念的經」，旁人可能很難想像為何有些人要在這些節日大鑼大鼓一行數十踩入酒樓擺三數圍酒席，同時，又不很理解那些明明是母/父親節，卻仍視若無睹、咩表示都冇的「孝子賢孫」想法。至於小妹我(&我的家庭)，就傾向按「母親節隆重其事，父親節當睇唔到」的本子辦事。

這種作風，完全多得家父深明大義——送花送禮去食大餐，為面子多於為份禮。其實這些「乜節物節」變成消費項目，的確不得不佩服商家們多年來有效又洗腦的宣傳策略：情人節由「簡單一封信，無窮愛意話你知～」變成要送花送朱古力；由日本傳來的3月14日白色情人節，男方又要向跟自己表白愛意、自己又有意思發展的對象回禮；復活節本來是宗教節日，後來又變成另類兒童節；聖誕節最誇，買樹買燈飾買襪買玩具食火雞大餐再加聖誕木頭蛋糕，屋企有未懂性小朋友，阿爸仲要記得扮聖誕老人同在假聖誕樹下放一堆用花紙包裝好的鞋盒！

當然，這亦非說家母不分青紅皂白，死都要慶祝，就算明知阿囡財政狀況一般，都要求買鑽戒買珍珠耳環再買支千年人蔘補補氣。只是，相信大家心裡早已明白，許多時母親口裡說不，面部表情卻很誠實：你做，她滿意；你不做，她黑面，所以又何苦要跟自己作對？真情假意無妨，呃呃氹氹有理！簡單如落樓飲餐茶你埋單、買枝十蚊以內有交易的花仔誰都可以輕鬆做到，何樂而不為？

同理，假如閣下父親擺明一副妒忌阿媽的尊容，有意無意間暗示其實生你育你阿爸都好辛苦好偉大，相信緊接而來的父親節，你將會被商家認定為斬到一頸血的最佳目標。而且，小妹深深覺得，要買東西送父親，其實遠比送東西給母親難，來來去去不外乎銀包、呔、恤衫、皮帶、筆、錶等數種。如不，何以大家總是說女人是消費能力最強的一個族群？

總而言之，除非你誓做不孝子，不然，都是乖乖等俾錢……