復活節旺季 3大超筍長線團

4月14至17日係復活節假期，本來就連放4日公眾假期，如果前或後請多4日假，即10至13日，或18至21日，計埋星期六、日，咁就可以請4日放10日假喇。

放咁耐假，最好梗係去旅行啦，無論你遞咗紙請假未都好，可能都苦惱緊，喺呢個旅行旺季有乜抵玩團。唔使愁喎，我哋精選咗3個超值長線團，全部埋單唔使$9,000，分別玩盡美國西岸、中東歐同北非突尼西亞。

 

 

$8,909 美國西岸7天團

 

復活節檔期，要搵個平價團真係唔易，但康泰呢個團，4月11日團費竟然可以做到$7,999；計埋稅項同雜費嗰$910，埋單其實都係每位$8,909，就可以玩足西岸6日（最尾一日係搭飛機返香港），真係抵到爛！

航空公司：聯合航空

 

 

索薩利托小鎮

通過金門大橋，距離三藩巿15分鐘車程，會嚟到索薩利托小鎮。呢度充滿歐式風格建築，環境寧靜，其海景包括整個三藩巿灣區，周圍又有好多畫廊同精品店，安逸舒適的感覺同繁華的三藩巿中心形成強烈對比。

 

拉斯維加斯

位於內華達州的拉斯維加斯係著名賭城及不夜城，賭場、酒店、商場林立，令人紙醉金迷。唔鍾意窮奢極侈的人，可以喺度睇吓魔術、雜技表演，一樣令人眼界大開。

 

大峽谷

大峽谷係亞利桑那州最著名的旅遊勝地，峽谷深1500米，總長349公里，景色壯麗；企喺高1,200米的Skywalk望落谷底，你會感受到個人的渺小，以及大自然力量的偉大。

 

 

$8,659 東歐8天團

 

踏入四月，進入春天，係到東歐旅遊的好時候。康泰的東歐4國8天團，遊遍中東歐斯洛伐克的布拉提斯娜、匈牙利的布達佩斯、 奧地利的薩爾斯堡同捷克的古姆洛夫、布拉格等歷史古城，喺團費包稅項同雜費下，4月9日出發，每人埋單都係$8,659，即係平均$1,100唔使玩足8日，啱晒budget唔多，又想一次過去晒中東歐重要古城的旅客。

 

航空公司：阿聯酋航空

 

 

薩爾斯堡

音樂天才莫札特的故鄉，該城風景優美，建築以巴洛克風格為主，其中薩爾斯堡天主教堂和米拉貝拉花園，係當地巴洛克建築的代表作，已入選聯合國教育科學文化組織的世界遺產名錄。

 

古姆洛夫古城

古姆洛夫古城係首都布拉格外，捷克最值得遊覽的古城。當地大部分建築都係中世紀遺留至今。

 

 

$8,204 突尼西亞8天團

 

東歐同美國西岸，對於去慣長線旅遊的人，應該唔會陌生，但遠在北非的突尼西亞，唔知大家有冇興趣？

突尼西亞首都突尼斯曾經係古文明迦太基發源地，經常與地中海對岸的羅馬帝國開戰，最後為對方所滅，及後又受到汪達爾、東羅馬帝國、阿拉伯同奧圖曼帝國統治，所以其歷史文化融合歐亞文化，現時以伊斯蘭文化為主，係北非除埃及以外，歷史文化最深厚的國家之一。

東瀛遊4月9日出發的8天團，遊盡迦太基遺址、開羅安、伊利捷古羅馬競技場等地，團費都係$6,999，就算計埋稅項同雜費都係$8,504，本來已經好平，如果用Citi bank信用卡網上報團仲平多$200，即係埋單$8,204！

 

航空公司：土耳其航空

 

▲$16,808呢個價未計Citi bank信用卡的每人$200優惠，計埋的話，每人團費除2後係$8,204

 

開羅安

開羅安係麥加、麥地那同耶路撒冷以外伊斯蘭的第4個聖城，其大清真寺係北非第二大。當地穆斯森話：「到開羅安朝聖7次可抵前往麥加朝聖一次」，可見開羅安喺伊斯蘭世界中的地位。

 

吉利特鹽湖

突尼西亞大部分國土為沙漠，而位於杜茲及吐澤兩個綠洲城巿的吉利特鹽湖，因為地理環境獨特，陽光照射鹽湖湖面，展現的海市蜃樓變幻莫測，其他沙漠難以媲美。