奧運冷知識－禁藥係禁咩藥？

里約奧運閉幕，喺閉幕禮上面睇到東京2020奧運嘅宣傳片，相信大家都好期待㗎喇。大家喺期待下屆奧運嘅同時，你哋對奧運嘅認識又有幾多呢？經常聽到奧運運動員要通過藥物檢查，到底藥物檢查係檢查啲咩？會唔會因為平時食嘅藥過唔到藥檢呢？

奧林匹克委員會下有一個獨立嘅部門，叫做世界反運動禁藥機構(World Anti-Doping Agency)，佢致力推動世界各地無禁藥嘅運動。佢制定咗一個運動員禁止嘅藥物以及行為，希望定立一個國際化嘅標準，令運動員可以喺一個公平嘅環境下作賽。

有啲咩藥會過唔到藥檢嘅呢？主要係如果嗰種物質可以提升運動表現，對運動員嘅健康做成影響又或會影響運動精神，都會被列入禁藥嘅列表，所以一啲仲喺研究階段或只準許用作動物治療嘅藥物都唔俾用㗎！佢個列表都將禁制嘅藥物分咗做好幾個類別，等我逐個類別同大家解釋下啦！

第一類主要係合成類固醇(Anabolic steroid)，當配合適當嘅飲食同埋訓練，呢類物質可以增加肌肉量以及力量，可以增強運動員嘅表現，所以被列為禁藥。雖然佢可以令運動嘅表現有所提升，佢都有唔少嘅負面效果，包括一啲嚴重嘅情況如高血壓、心臟病、高血脂以及肝臟及腎臟腫瘤等。男性使用之後可能會出現㪍起功能障礙、不育、禿頭及嚴重暗瘡等情況，而女生亦可能會出現面部及身體毛髮增新、經期出現問題、聲線變得低沉以及脫髮等情況。除咗種種負面效果，呢類物質亦都會做成上癮。

第二類就係肽類激素及生長因子 (Peptide hormones及Growth factors)。Peptide hormones係一種由胜肽組成嘅荷爾蒙，佢可以影響我哋嘅內分泌系統，而Growth factors就可以促進生長及癒合。佢哋同樣可以提升運動表現所以被列為禁藥。近年濫用呢種物質嘅情況似乎有上升嘅趨勢，原因可能包括呢種物質近似身體天然嘅份子所以難以檢測，而且佢哋會快速被身體分解並且排出，所以檢測到佢哋嘅時間會變得好短。其中EPO(Erythropoietin)可以增加紅血球嘅數目，令身體帶氧嘅能力提高，藉此提升運動表現。濫用EPO亦有副作用，包括高血壓、頭痛及增加血管栓塞嘅風險，嚴重可導致死亡。EPO本身喺醫療上嘅用途都好廣，例如貧血等情況。

第三類則係Beta-2 受體激動藥(Beta-2 agonist)，呢類藥物其實又係醫療上好常見，佢哋作用於beta-2 受體，可以令平滑肌(smooth muscle)放鬆，從而令呼吸道擴張，所以好常見用於治療哮喘以及慢阻性肺病。理論上因為可以吸多咗空氣，所以會提升運動員嘅表現。如果咁講，係唔係有哮喘嘅運動員就永遠通過唔到藥檢呢？咁又唔係嘅，因為有豁免嘅！吸入式嘅salbutamol、formoterol以及salmeterol只要濃度乎合某個水平就可以得到豁免。其實根據一篇學術文章，研究結果證明唔到吸入式嘅Beta-2 agonist對運動表現有幫助，唔似得口服嘅可以提升表現，不過而家就算係吸入式，除非證明到係因為藥物動力學(Pharmacokinetics)嘅關係，否則超過某個水平依然會被視為使用禁藥啊！

第四類則係荷爾蒙及代謝調節劑(Hormones 及 Metabolic modulators)。如果將佢哋同合成類固醇一齊使用，可以對抗合成類固醇嘅副作用。當男性將Tamoxifen及合成類固醇一齊服用，可以避免產生男性乳房發育(gynecomastia)，而女性服用Tamoxifen就可以增加男性化嘅特徵。服用荷爾蒙及代謝調節劑可能會帶來腸胃不適以及水腫等問題。

第五類受禁制嘅物質就係利尿劑以及掩蔽劑(Diuretics 及 Masking agents)。利尿劑可以增加排出嘅尿液，從而控制體液嘅份量。利尿劑喺醫學上有好多用途，例如會用喺高血壓、腎臟及心臟衰竭等情況。利尿劑喺運動上被禁止係因為佢可以用來控制體重，咁樣喺一啲以體重去分組嘅體育項目上就會有唔公平嘅情況。另一個原因係因為佢可以稀釋尿液中其他禁制物質嘅濃度，增加咗檢測藥物嘅難度。服用利尿劑可能會導致血壓下降、暈眩、脫水及鉀不足嘅情況。

第六類被禁制嘅物質係興奮劑(Stimulants)。呢個類別好易就會聯想到會提升運動員嘅表現。服用興奮劑可以提升耐力以及減低疲勞。雖然可以提升表現，興奮劑亦可以令運動員變得煩燥難以集中，亦可能會輕微高血壓和幻覺等。

而最後2種受到禁制嘅物質就係麻醉藥及大麻(Narcotics 及 Cannabinoids)。麻醉藥(Narcotics)可以減輕痛楚，當用喺運動上可以令運動員突破平日忍受到嘅痛楚，咁樣會增加咗運動員受傷嘅機會，呢類藥物亦都有上癮嘅風險。而大麻被禁止係因為會對運動員構成傷害，大麻會令反應時間減慢，亦會增加心跳或令時間空間感受扭曲。

想查閱詳細嘅禁制物質列表，可以去<呢度>睇。

其實市面上都有唔少補充劑產品可以幫助提升運動表現。一講起運動補充品，好多人都第一時間諗起蛋白奶粉，其中一隻就係Whey protein，佢係由牛奶製造芝士嘅過程中剩下嘅液體中提取。Whey protein可以用來提升運動表現或作一個營養補充劑，適當服用大致上安全，服用過量可能會引起腸胃不適、食慾不振及疲累等情況。

另一隻補充劑係Creatine。Creatine 係由胺基酸組成，可以幫助食物轉化為能量。我哋可以喺日常飲食吸取部份Creatine，其餘嘅身體會合成。有說服用Creatine補充劑可以提升運動表現，不過呢個講法未有定論，能唔能夠提升運動表現受到好多因素影響。服用Creatine可能會引起水腫、肌肉痛、高血壓及肚瀉等，建議服用時要飲大量嘅水。

仲有其他好多款嘅補充品，決定服用之前記得要多做資料搜集，睇清楚個效用同可能帶來嘅副作用，有唔清楚或疑感就問番醫護人員喇！

相關產品：

GNC 純乳清蛋白

GNC特效肌氨酸

由即日起至2016年8月31日，於萬寧累積合資格簽賬滿港幣1,000元，可享高達額外12%「獎賞錢」回贈。而以Apple Pay或其他感應式付款功能作單一交易滿港幣500元，更可即獲港幣10元現金優惠券於下次購物時使用。此外，透過Apple Pay 作3次滿港幣30元的交易，可享額外$10「獎賞錢」。

信用卡優惠詳情可以去<呢度>睇。

參考資料：
Kindermann, W. (2007). Do Inhaled ??2-Agonists have an Ergogenic Potential in Non-Asthmatic Competitive Athletes? Sports Medicine, 37(2), 95-102. doi:10.2165/00007256-200737020-00001
Cadwallader, A. B., Torre, X. D., Tieri, A., & Botrè, F. (2010). The abuse of diuretics as performance-enhancing drugs and masking agents in sport doping: Pharmacology, toxicology and analysis. British Journal of Pharmacology, 161(1), 1-16. doi:10.1111/j.1476-5381.2010.00789.x 
Anabolic steroid misuse . (n.d.). Retrieved August 24, 2016, from http://www.nhs.uk/conditions/anabolic-steroid-abuse/Pages/Introduction.aspx 
Barroso, O., Mazzoni, I., & Rabin, O. (2008). Hormone abuse in sports: The antidoping perspective. Asian Journal of Andrology Asian J Andrology, 10(3), 391-402. doi:10.1111/j.1745-7262.2008.00402.x 
Anti-Doping Fact Sheets. (n.d.). Retrieved August 24, 2016, from https://www.irishsportscouncil.ie/Anti-Doping/Education-Zone/Anti-Doping_Fact_Sheets/