嘉嘉♥積分里數轉換大挪移

對於香港人嚟講，最多人玩嘅飛行里數計劃應該係Asia Miles。不過有時出Trip、去旅行搭嘅航空公司、住嘅酒店未必係Join Asia Miles，搞到剩咗啲里數喺度，換機票又唔夠，其他禮物又換唔落手，眼白白睇住佢過期，好蝕呀。

我諗各位里數精都知道有個地方可以將唔同飛行里數計劃或者積分計劃嘅里數或分數轉去其他Plan，就係Points.com喇！雖然佢唔係Support晒所有計劃，但係有Asia Miles、Delta SkyMiles、IHG Rewards Club，有需要時可以轉來轉去，將啲少用嘅里數Group埋去常用或有用嘅計劃，用盡啲積分里數。

Points.com主要有兩個功能，第一係可以喺唔同計劃之間嘅積分里數轉換 (Exchange) ，例如Asia Miles轉過去Delta SkyMiles，當然你要有呢兩個計劃嘅Account，並登記入Points.com。而邊個計劃可以同邊啲計劃轉換，同埋唔同計劃之間嘅轉換率，登入咗就可以睇返。另一種換里數嘅方式係交易 (Trade)，即係同其他用戶交易。


手續費方面，轉換唔使錢，交易手續費就按轉換計劃同埋數量多少而定，有時可能貴過你直接買里數，交易之前最緊要睇清楚。而轉換里數個Rate亦未必係1：1，抵唔抵轉就自己考慮啦，係無謂擺到啲分過期咁解啫。其實Points.com最好嘅地方，就係可以一次過Check返你已經登記咗嘅計劃有幾多積分或里數，唔使逐個Login。