似去咗歐洲童話國度！元朗花海8個影相靚位

新界一向多農莊，以花海作賣點的卻不多，因此小編一收到風便立刻飛奔到448農莊，希望一睹花海盛開感受春天氣息。但去到先知，原來呢個農莊唔止得個花海咁簡單！面積十萬呎的園內仲有好多激靚影相位，唔講真係以為去左歐洲！除此之外呢個農莊仲有得露營、餵小動物、親手燒土窰雞、學爬樹、學種植、學插花、開電動車等，周圍鳥語花香，不時傳來一家大細的笑聲...真係好似進入左童話故事書咁。唔講咁多，即入正題睇邊啲位影相最靚！

因為無公共交通直達，建議大家直接喺元朗搭的士，車費約$30~$40。入場費為每人$50，對耕種有興趣的話，可以加$30有導賞帶你參觀。

 

入口嘅小木屋已經好有童話感覺！

 

1.花海
香港地有花海真心好難得，唔係唔影呀？建議大家可以著得plain啲，唔好同後面嘅花海background撞色~

後面個景真心似去咗荷蘭啲鄉村

2.歐陸風純白色單車
好有影結婚相感覺...同後面嘅巴士一齊影效果更好

可以真騎，亦可以坐喺草地上用假花做props

3.英倫退役巴士
由樹根哥親手改裝嘅紅色巴士好有英倫味道，伴著藍天白雲影相一流！不久之後會打造成cafe，大家可以趁而家盡情上去參觀。而每逢weekend的晚上，巴士會掛上超大螢幕供大家觀看戶外電影，兼有燒烤爐免費借用，大家可以邊睇戲邊燒野食！





4.希臘風藍白cafe
藍白色配上周圍嘅綠色植物，感覺相當悠閒點影都靚~

5.餵飼羊咩咩
農莊總共養咗18隻羊，平時會比佢地周山跑。而每逢4點，負責人就會吹咇咇召喚羊群，到時大家可以免費任餵羊仔！所以如果想睇羊就唔好太早到農場，因為要等到4點先有得睇。

6.泰國沙灘椅
真心...呢到似香港咩？話說所有休憩區中嘅木椅同裝飾都係由樹根哥親手用棄置卡板改裝而成，真係好有heart！

7.倫敦古董老爺車
不解釋，有feel。

8.七個小矮人
仲唔係童話？同後面嘅graffiti竟然毫無違和感~



其實除咗呢8個點之外，沿途仲有唔少靚景可以隨拍，翠綠嘅背景加上陽光就係最好嘅filter，基本上求其影都靚！

小賣部係由貨櫃改造而成，價錢亦合理，入到嚟唔驚斷水斷糧！

有嚮導的話，就可以入溫室試食自家種超甜番茄

認住呢隻鸚鵡，超嗲啊啊啊!!!會係咁伸個頭嚟博你摸~至於其他鸚鵡就比較寸。場內仲有兔仔、文雀、陸龜等比大家近距離觀賞！

仲可以帶埋寵物黎玩！呢到真心一家大細老少咸宜啊~~~
溫馨提示：記得搽蚊怕水，記得搽蚊怕水，記得搽蚊怕水（重要的事說3次）小編表示隻腳已經腫成豬蹄´థ,_థ

448農莊
地址：元朗欖口村欖堤東路
時間：9am-5:30pm
電話：6684 1448 / 5666 5448