世界遺跡蜜月Trip

今年係咪特別好年？點解咁多朋友都揀今年結婚呢？可能我Lady C.比人既印象係成日發白日夢等中六合彩環遊世界，所以一有朋友結婚（又或者係朋友既朋友既朋友結婚），佢地就好鍾意嚟問我：有咩渡蜜月聖地介紹呀？

老實講，Lady C.我出國既經驗真係5隻手指都數得晒，只係得閒無聊鍾意睇旅遊節目同留意旅遊資訊，唔覺唔覺就比朋友們封為「旅遊達人」喇（誤）。上次睇完個節目介紹就嚟消失既世界遺跡之後，就一直想像可以同摯愛喺遺跡留影會係件幾咁浪漫既事。好！我決定建議一個「世界遺跡x蜜月trip」比佢地（其實係想自私地叫朋友夫婦身先士卒去試下個Plan得唔得先）！

如果按遺跡消失既次序排序，我會提議佢地去一趟台北自由行先，一來台北出名靚景多，二來佢兩個又咁鍾意親親大自然，佢地可以去著名既台灣千島湖影靚人、影靚景~~ 再唔係可以去下台北新景點誠品松菸「到此一遊」呀！臨走先去埋台北野柳地質公園睇「女王頭」石像，始終地質公園可能冇咩好玩嘛。

諗諗下，成日旅行既佢地好可能已經去過台灣幾次，澳洲大堡礁可能會岩佢地多D。我諗得好周到架，我知佢夫人時刻都要化妝（連BBQ都唔例外），要佢落水整花個妝佢實say no，不過唔緊要，佢可以選擇戴住防水頭盔海底漫步呀，妝可以照化之餘仲可以欣賞大堡礁海底既另一個世界。至於朋友雖然唔識游水，但係都一樣可以潛水睇珊瑚，全程有潛水教練磅住嘛。如果佢想，佢仲可以懶到水都唔踢，就咁比教練拖住游都OK，冇嘢需要擔心呀。


或者喺推薦個世界遺跡蜜月trip比佢地之前，我應該問下佢地張婚紗相有着落未。未影相既話，其實Lady C.我仲有另一個方案架，佢地可以考慮去比薩斜塔影結婚相喎。如果比我揀，我會想我張結婚相係得意好玩D既，可以學佢（見下圖）咁擺post影相呀~