​$5=1里數 東亞Flyer World萬事達卡開放申請

東亞上年出咗一張新專門儲里數嘅Flyer World萬事達卡，做$8=1里數唔算特別抵，但勝在網上繳費有分，連交學費同保險費都有分，所以有唔少人對呢張卡有興趣。不過東亞一直冇開放申請呢張卡，只係幫現有客戶Upgrade。今年東亞已經改咗例，用佢交學費同保險費唔再有分，但佢最近終於都可以直接申請，加咗無限1.6X獎分，即係變成$5=1里數，仲有最低$1.5=1里數迎新，都幾吸引喎。

全年1.6X積分
原本Flyer World萬事達卡做$8=1里 (8分=1里數)，但開放申請之後加咗1.6X積分優惠，即係簽$5=8分=1里數，除咗一般消費簽賬，八達通自動增值、網上繳費 (記住交稅、學費、保險費例外)、網上簽賬都一樣有分，都幾實用。

迎新6,000里數
跟住講下迎新點賺，頭3個月簽滿$9,000就可以拎到40,000分，包括簽賬$9,000嘅基本14,400分 (1.6X積分)，迎新送嘅25,600分，總共40,000分，8分=1里數相等於$1.8=1里數，如果加埋網上成功申請送嘅8,000分、計埋即係6,000里數，去到$1.5=1里數。雖然唔及有啲卡$1或$1.25=1里數，不過平均每個月簽$3,000，要賺盡唔難。

積分5年有效期 換里數免手續費
用Flyer World萬事達卡積分兌換里數免手續費，可以慳一筆，積分有效期60個月 (5年)，年期較長可以慢慢儲，唔使急住換。不過積分就只可以換Asia Miles里數，唔可以換「分分獎賞集」入面嘅現金券或電影禮券。

需與銀聯雙幣白金信用卡一同申請
之前由其他卡Upgrade上去，唔使睇年薪，而家申請Flyer World萬事達卡資格就要年薪$300,000或以上，門欖有啲高，同時要連埋銀聯雙幣白金信用卡一齊申請。至於年費方面，Flyer World萬事達卡係$1,800 (首年豁免)，銀聯雙幣白金信用卡係$600，每年簽夠指定金額可以waive Flyer World萬事達卡年費。

HongKongCard會員已經喺討論區發起咗呢張卡嘅討論 (詳情同詳情)，大家可以去傾埋一份，了解更多關於呢張卡嘅資料。