好多鍾意旅行嘅人，簽卡主力賺里數換機票，不過有部分唔係經常去旅行嘅人，就鍾意現兜兜賺現金回贈，當係折扣，或者上外國網站買嘢，補返外幣交易手續費。今次我就講下一啲賺現金回贈比較有著數嘅卡，可以係唔同場合應用，賺多啲回贈。
揀回贈信用卡除咗要留意佢哋嘅回贈比率高低，仲要留意佢嘅回贈上限，有啲限簽賬額，有啲限回贈金額，如果個額低，就算回贈比率幾高都係嘥氣。同時要睇下簽賬種類有冇特別限制，一般消費簽帳自然有回贈，不過網上繳費、八達通自動增值就唔係張張卡都賺到回贈。
下面個表列出咗10張信用卡現金回贈嘅資料，我亦會逐張講下佢哋嘅特點。
信用卡現金回贈比較表
海外簽賬2%，本地1%，全年冇上限。如果有渣打出糧戶口，可以永久免年費。
迎新回贈優惠
頭2個月5%現金回贈，累積簽賬$2,000或以上，最高回贈$500，好易賺！
大新ONE+Titanium卡 / 白金卡－回贈無上限
全年1%現金回贈，冇上限。如果年薪唔夠，可以申請門欖低啲嘅Titanium卡。
迎新回贈優惠
可以揀頭3個月5%回贈，基本1%加額外4%，優惠期內額外回贈上限$300，要簽$7,500先賺盡。
Citibank Cash Back American Express Card－食肆回2%
餐飲消費全年2%現金回贈，其他消費都有1%，不過收American Express卡嘅地方始終唔夠Visa / MasterCard及普遍，要去大間啲嘅商戶先得，同埋海外簽賬會收2.454%手續費，都係留係香港用好啲。但好在佢嘅回贈可以抵銷結欠同新簽賬。
迎新回贈優惠
發卡後頭2個月簽滿$4,500至$8,999有$300回贈，簽滿$9,000或以上有$600。
安信信用卡－按比例計算
全年0.67%，簽$150回贈$1，比率一般，但唔夠$150亦會按比例計算，唔會好似部分卡咁唔夠數就唔計，而且回贈冇上限，可以賺盡啲。
迎新回贈優惠
即日起至10月31號，網上申請成功批核，有$100回贈；發卡後頭3個月申請八達通自動增值，增值滿$2,000，就有$100回贈，不過而家申請未必趕得切賺到呢兩個回贈啦。
華僑永亨白金卡－銀聯白金中國專用
申請時可以揀「高達0.8%現金回贈」計劃，一般簽賬0.6%，本地食肆同海外簽賬就有0.8%。如果係銀聯白金卡，喺中國有3X (2.4%)回贈，海外都有2X(1.6%)，返大陸用都唔錯。另外佢做緊Promotion，新加坡、馬來西亞、印尼海外簽賬有5X回贈，優惠期內最多回額外$200。
迎新回贈優惠
銀聯白金信用卡同時申請Visa卡或MasterCard，頭2個月簽滿$2,500，會有額外$100回贈。要出咗張卡，有啲無謂。
信銀國際白金卡－首年1.5%
全年0.55%，每月回贈簽賬上限係張卡嘅信用額或者$100,000，如果你張卡Credit唔夠$100,000，其實即係冇上限。如果係信銀國際CITICfirst客戶，佢張CITICfirst白金卡現金回贈簽賬上限係信用額，亦係冇上限。發卡後頭12個月本地同海外簽賬有1.5%現金回贈，每月回贈上限$100，每月要簽$6667。
迎新回贈優惠
可以揀$300現金回贈，網上申請額外多$100現金回贈 (兩者都係頭2個月簽賬3次，每次$500或以上)，發卡後頭3個月申請八達通自動增值，同時成功增值1次，就有$50回贈，最多登記4個名額，即係最多回$200。
MANHATTAN Platinum信用卡－專門買戲飛
全年0.5%現金回贈，冇上限，個比率一般，但特別在每月簽夠$2,500，全港任何戲院簽賬就有50%回贈，每月最多回$200，而且網上買戲飛都計。
迎新回贈優惠
網上成功申請，頭2個月簽夠$5,000，除咗自選迎新禮物，仲有網上申請嘅額外$100回贈。
DBS Eminent Card－外幣簽賬
網上同海外外幣簽賬有3%，雖然比率好高，但要累積簽滿$5,000先計，每月上限回$300，扣埋外幣交易手續費，大約回1%左右。而一般簽賬回0.4%，唔算高。另外本地食肆亦有3X DBS$，簽$250回$3。
迎新回贈優惠
頭2個月簽滿$4,800回$200，簽滿$10,000回$400，合共可賺$600。
Citi Clear Card－外幣網購
專門做網上外幣簽賬有2%，其他簽賬全年0.4%，比率低，唔抵用，上限只限首$10,000簽賬，但勝在申請門欖同年費都低。
迎新回贈優惠
頭2個月回 (6%)，簽滿$4,000至$7,999回$240，簽滿$8,000或以上回$480。
東亞銀行i-Titanium卡－本地網購
網上購物回3% i-dollar，每個月最多回$200 i-Dollar，即係$200。一般簽賬就回0.4%
迎新回贈優惠
頭2個月網上購物回10% i-Dollar，優惠期內最多回$600 i-Dollar，亦相當易賺。
總結一下咩情況用邊張卡好：
一般本地消費：渣打行政人員白金信用卡
食飯：Citibank Cash Back American Express Card、DBS Eminent Card
睇戲：MANHATTAN Platinum信用卡
海外簽賬：DBS Eminent Card
中國簽賬：華僑永亨銀聯白金卡
本地網上簽賬：東亞銀行i-Titanium卡
海外網上簽賬：Citi Clear Card