​手機變信用卡 隨時PayPass買嘢 (基礎篇)

​手機變信用卡 隨時PayPass買嘢 (基礎篇)

相關信用卡:

​手機變信用卡 隨時PayPass買嘢 (基礎篇)

發表日期: 2015 年 07 月 28 日 更新日期: 2015 年 07 月 28 日 生活

作者:積克

信用卡有payWave同PayPass非接觸式付款功能,有部分銀行亦有出Mobile Payment,可以用NFC手機做非接觸式付款。最近HKT香港電訊出咗個名為《Tap & Go「拍住賞」》服務,可以將手機變成MasterCard,隨時用PayPass買嘢俾錢,就算本身冇信用卡都可以用。


申請服務換SIM卡
要用呢個服務,首先要去csl或1010門市申請 (當然你要係用緊佢哋手機網絡),官網話要帶身份證同近3個月個住址證明副本,我去到門市申請,店員問我攞身份證影印,佢亦用返我手機Plan個登記住址,唔使我俾副本。不過有心申請,都係帶定住址證明穩陣。我本身用緊八達通SIM卡,要用Tap & Go都係要再換SIM卡,如果八達通SIM卡入面仲有錢,我建議用晒先去換卡,就唔使搞退錢咁麻煩。萬一之後唔見咗部手機,可以即刻搵電話打去csl,即時停咗呢個服務。


舊客免費換卡。


安裝App及啟動服務
將新SIM卡入落手機之後,就可以去Google Pay下載拍住賞App,啟動服務。App會自己產生一張虛擬MasterCard信用卡,不過大家要留意,呢張卡係類似Prepaid卡,要預先入錢增值先可以用,本身冇預設信用額,而增值上限係$10,000,每年上限$700,000。

首先入身份證號碼,之後就等佢Setup信用卡。

入電郵地址作為網上管理登入名稱。

Set 6位數字密碼,完成啟動程序,收到SMS同Email通知。

經電郵入面連結去設定管理網站賬戶,入電郵地址同埋SMS入面嘅一次性密碼登入。之後更改密碼,要8位以上,包含至少一個英文大楷、一個英文細楷同一個數字,之後就可以喺網上睇返交易紀錄。

呢張虛擬信用卡有齊信用卡號碼、有效日期同CVC2驗證碼,可以做網上購物,啱學生或者家庭主婦呢類比較難申請信用卡人士。外幣交易手續費2%,海外以港幣交易收1%手續費。

喺設定入面可以Set唔使開住App都可以俾錢,不過我建議Disable咗佢,會安全啲。

可以設定交易提示,過咗指定金額或有任何海外交易,就會收到App或SMS通知。

增值方式
增設可以透過大新信用卡自動或隨時 (手動) 增值,或者去門市俾錢增值。信用卡增值每次最低$500,最高$10,000;門市現金增值最低$100,最高$3,000。

喺主頁撳「增值」,就可以設定信用卡增值,目前只支援大新一間銀行嘅信用卡。設定自動增值預設金額,同埋低於某個指定金額就會自動增值。如果唔想用自動增值功能,可以揀「只選擇隨時增值」。

揀返用Visa定MasterCard做增值,入返卡資料,然後就會收到SMS通知。申請完等銀行審批,通常要等一、兩日,批咗就會收到SMS通知。申請完就可以喺「增值」做手動增值同設定自動增值。


即時用戶對用戶過數
呢個服務特別之處,就係「拍還拍」功能,可以用戶同用戶之間即時過數,可以A手機經NFC過數比B手機,亦可以遙距經電話號碼過數,例如阿仔落街買嘢唔夠錢,阿媽喺屋企都可以用手機過數落阿仔部手機。


購物過數有優惠
新推出嘅服務,點都要有啲優惠先引到人用。啟動咗Tap & Go,可以登記MasterCard樂遊賞,亦會自動成為759阿信屋會員,8月8號起拎住部手機打開電子卡,就可以當會員卡用。而喺8月8、9號,用Tap & Go買正價同街坊價貨品,會有半價優惠

另外,喺12月31號前,用「拍還拍」個數比其他流動電話號碼,會有csl The Club 50積分,最多可以賺100分,咁搵到兩個人過數,再過返數或俾返Cash自己,就可以免費賺分?

下回分解
好喇,講完Tap & Go嘅功能同點樣申請,下次將會繼續講下實際應用,例如增值同買嘢。

相關文章:
手機變信用卡 隨時PayPass買嘢 (實際應用篇)