​善用30,000里數 飛盡日韓台

辛辛苦苦儲咗啲里數，梗係要用盡佢。剛剛接觸里數嘅朋友自然好直接咁換一套來回機票，但玩開里數嘅達人都知道，其實可以唔止換到香港來回某個目的地咁簡單，以Asia Miles為例，里數換一套機票，可以包含2次停留(Stopover)、2次轉機同1次終斷(Open-jaw，又稱開口或缺口)，唔止玩一個地方㗎。

簡單講下轉機、Stopover同Open-jaw係乜先：
轉機：喺轉機地點停留唔超過24小時，要搭最近有機位提供嘅航班轉機。
Stopover：停留超過24小時。
Open-jaw：抵達城市不同於出發城市，或者並非由最初抵達嘅城市回程，例如香港去東京，玩完自己去大阪，然後回程由大阪返香港。

最近日圓同韓圜都跌，去旅行就啱晒。就以香港來回日本或韓國為例，換機票需要30,000里數，利用Stopover、轉機同Open-jaw航程去到日本 / 南韓轉內陸機，或飛埋去鄰近地區 / 城市都可以。亦可以利用轉機，換一啲比較爆或比較少，難換飛嘅直航航程。


計劃航程注意事項：
－要度條成立嘅航程，就要睇返個別航空公司有冇嗰條航線，呢個上返航空公司網站就Check到。
－就算構思咗條表面上係成立，都仲要睇返再航空公司規矩，例如中國國際航空同西班牙國家航空唔接受Stopover同Open-jaw。
－最大前提梗係要有機位，一度好航程即刻要打去CS問，因為某些航班機位唔多。
－度航程嘅時候最好有兩手準備，諗定後備航程，即使心水航程Full咗，亦都有第二個Plan可以揀。如果中間再自費坐車坐廉航駁腳，咁靈活性就更大啦。

點樣換機票？
要換呢類有轉機、Stopover同Open-jaw機機票，係要聯絡CS，人手幫你搞。可以打電話 (要俾啲耐性等有人聽)、Send Email去問 (等幾日左右回覆)、上網填「兌換飛行獎勵申請表」(都係等幾日左右回覆)、或者直接去機場Asia Miles Counter度搞(如果你咁啱要飛、送機接機、喺機場返工、住東涌、或者路過)。

航程建議
以下介紹幾個基本航程俾大家，等大家可以作為參考，然後再按照自己想去嘅地方，研究下點Plan航程。至於實際上個航程成唔成立，都係以Asia Miles決定為準。

旅行地點：札幌 / 北海道，東京
香港飛東京羽田機場 (國泰)
東京羽田機場飛札幌 (轉機，日航)
旭川飛東京羽田機場 (日航)
東京羽田機場返香港 (國泰)

呢個行程主要係去札幌 / 北海道，玩完自費去旭川，飛東京停留玩下，再返香港。如果唔想去東京，可以將東京變成大阪、名古屋、福岡。

旅行地點：日本、南韓
香港飛大阪 (國泰)
大阪飛首爾金浦機場 (日航)
首爾仁川機場返香港 (國泰)

兩個地點都可以改為其他城市，即係東京同首爾、大阪同釜山，方向亦可以調轉，先南韓後日本。如果調返轉，再加一程Open-jaw，可以玩埋濟州：

香港飛濟州 (國泰)
濟州去釜山 / 首爾 (自費)
釜山 / 首爾去大阪 / 東京 (日航)
大阪 / 東京返香港 (國泰)

旅行地點：日本、台灣
香港飛東京 / 大阪 (國泰)
東京 / 大阪飛台北 / 高雄 (日航)
台北 / 高雄返香港 (國泰)

日本可以改做南韓，台灣可以Open-jaw，台北入，高雄返香港。