信用卡賺Asia Miles里數比率比較
更新日期: 2015 年 03 月 12 日
雖然近期Asia Miles經常有戶口被Hack，被人換走晒啲里數，不過佢始終都係香港人常用嘅飛行里數計劃，積分還是要儲，里數還是要換，旅行還是要去。
咁多間銀行，咁多張卡，邊張卡可以換到Asia Miles里數，簽幾錢先換到1里數，新手可能唔完全清楚，卡精同里數達人又可能會一時唔記得，所以我整咗個表出嚟，睇下各銀行信用卡簽賬儲里數嘅比率，方便大家比較。
以下個表只會列出基本本地同海外簽賬嘅里數兌換比率，至於一啲特別加乘，例如網購或食肆會有額外積分、指定類別商戶或日子簽賬有加倍獎賞、迎新、限時優惠等，就冇包括在內。
簽賬賺里數例子
咁邊張卡簽賬會賺得多啲？我會用例子嚟解釋，假設本地同海外簽賬，只計基本兌換比率，用比較優惠嘅信用卡嚟計下數。
本地簽賬例子：買一個法國 Le Creuset 22cm鑄鐵鍋 ($3,488)
東亞銀行Flyer World萬事達卡：$5=1里數，可賺697里數
渣打WorldMiles卡：$5=1里數，可賺697里數
Citi Prestige 信用卡：$6=1里數，可賺581里數
交通銀行鑽石信用卡：$6=1里數 (簽賬$300或以上)，可賺581里數
海外簽賬例子：係意大利買個Prada Saffiano長形銀包(450歐元，大約$3,705)
富邦白金卡 / Titanium卡：$3=1里數，可賺1,235里數
美國運通國泰航空尊尚信用卡：$4=1里數，可賺926里數
Citi PremierMiles信用卡：$4=1里數，可賺926里數
DBS Black Card：$4=1里數，可賺926里數
永隆Luxe Visa Infinite卡：$4=1里數，可賺926里數
如果要換香港來回日本機票，需要30,000里數，買三千蚊嘢，都係賺一千幾百里數，咁大家可以諗下要買幾多個鑄鐵鍋或者銀包先換到啦。
夾優惠快速儲里數
當然，識玩里數梗係要夾埋優惠嚟儲，先會儲得多儲得快，例如：
指定類別 (航空及旅遊、酒店住宿、食肆及酒吧)
永隆Luxe Visa Infinite卡指定類別簽賬本地3X積分($4=1里數)，海外5X積分($2.4=1里數)，食肆同酒吧都經常會簽，算易賺。
指定類別+指定日子 (星期五)
匯豐「最紅自主獎賞」+「最紅星期五」11X「獎賞錢」，雖然簽$250先有$1「獎賞錢」，1里數要$16.67，但如果星期五食正6X自選類別，就會變成$1.52=1里數，勁好賺。
網上購物
建行(亞洲)eye卡網上交易5X積分，上網買嘢啱晒。如果係網上買機票，網上或海外外幣簽賬，登記埋「賞即飛天地」會有額外2X積分。
指定類別 (超市、百貨公司、電訊公司)
Citibank Rewards信用卡喺指定類別商戶有5X積分，交電話費、寬頻費都有。