​信用卡消費FAQ - 積分與兌換獎賞篇

大家辛辛苦苦簽埋簽埋咁多卡數，無非都係想賺盡啲積分換里數或者現金券。不過到底換里數好定係現金券好？有啲咩要留意？今次又等我同大家研究下。
 

Q：邊張信用卡賺積分 / 里數快？換里數邊張卡唔使手續費？啲分積分幾時到期？
A：為咗方便大家參考，我整咗下面個表，可以一次過答咗呢三個問題。除咗有得換里數嘅銀行，我都列埋冇里數換，只有現金券或禮品換嘅銀行嘅積分有效期出嚟。

 

 

一啲專門儲里數嘅卡 (美國運通國泰航空信用卡、東亞Flyer World萬事達卡、DBS Black Card、渣打亞洲萬里通萬事達卡)，又或者較高階嘅卡 (Citi Ultima Card、Citi Prestige信用卡、Citi PremierMiles信用卡)，都唔使手續費就可以直接自動或手動換里數。換里數手續費就由$50至$500不等，單睇手續費的話，除咗唔使錢嗰啲，交行換幾多都係俾$100，其實唔錯，只係賺里數速度未必夠其他卡快。

至於積分有效期，永久有效嘅都唔少，唔係經常大額簽嘅可以慢慢儲。富邦就比較短，雖然佢有海外簽賬4X至20X積分加持，但有效期得一年，可能儲得唔多分又到期焗住換嘢。

Q：其實啲分要嚟換里數好，定係換現金券好？
A：呢個問題首先當然要問返自己想要啲咩，然後就睇下而家有幾多分可以換嘢，由於換里數要俾手續費，如果啲分唔夠多，其實唔一定抵換，就例如富邦，最少都要俾$250兌5,000里數，其後每5,000里數俾多$50，最多收$500，即係要換30,000里數 (450,000分) 以上先會攤薄到手續費。除非係爭嗰啲里數先夠換機票，否則通常用25,000分換$100現金券 / 現金回贈唔使手續費，係少分者嘅好選擇。

Q：咁如果換現金券，又換邊啲好呢？
A：首先又係要問下自己嘅消費習慣，會唔會經常幫襯某超市、快餐店、個人護理用品店、電器舖，通常銀行都有得換主要大型連鎖店嘅現金券，總有一款啱使。當然，有啲可以換現金回贈，仲更加實際。

如果鍾意睇戲，亦可以考慮下換電影禮券，因為通常用25,000分可以換到2張電影禮券 (Citi Rewards Card 10,000分換1張)，睇某啲場次嘅2D電影係未必要補錢，以每張飛$75計，已經係$150。

有啲信用卡，例如中銀會視乎持卡人年資，積分換現金券會有折，滿11年至20年8折 (20,000分換$100)，滿21年或以上6折 (15,000分換$100)；而Citi Rewards Card換指定現金券會有至少9折，仲有啲卡有不定期換領優惠，都可以留意。

Q：我連換現金券都唔夠分，但又唔想浪費咗啲分，有冇方法用埋佢？
A：有啲信用卡可以去指定商戶將積分當現金用，例如中銀可以用200分當$1、匯豐$1「獎賞錢」當$1；Citibank嘅Citi ThankYou Rewards「積分當現金」可以250積分換$1現金回贈。