【飽到爆】祖琪帶你食 飽到爆土耳其大餐

平時食嚟食去都係日本菜呀，韓國菜呀咁～真係想試下啲新嘢～
今次祖琪根據探子回報，尖沙咀有間土耳其菜幾特別～香港貴為美食天堂，我哋梗係乜都要試下啦 ^_^～
溫馨小提示：雖然個地點喺尖沙咀，但係其實喺紅磡過去係近啲㗎～


一入到去個環境好開揚，因為佢有好大塊玻璃，坐窗口有啲陽光照射入嚟，擺個靚pose，大家都可以影男神女神相～
好啦，係時候開始講主菜啦～


其實我一直對土耳其菜都無咩概念，今次發現，原來土耳其菜肉類佔量比較多。有牛，雞，羊，烤肉啦，燒肉。佢地可以將呢啲肉混係唔同嘅款式裡面。
我哋為咗一次過試晒啲肉，我哋就嗌咗土耳其什錦燒肉拼白飯（二人份）。其實佢真係好大份～～我建議兩人去的朋友，叫一人份就得啦～

食評時間：

土耳其什錦燒烤肉

超級非常豐富嘅什錦燒肉拼盤！有烤羊肉，雞肉，牛肉，仲有燒雞肉，雞翼，仲有大量蔬菜～一次過滿足你6個願望，哈哈！呢個什錦拼盤鍾意食肉嘅朋友仔就啱晒啦～事實上，食完呢個，呀琪已經飽～～～
好食指數 8.5/10

特色土耳其薄餅

個pizza一上枱嘅時候，我對眼只係留意一樣野－無錯，係芝士。土耳其pizza用嘅芝士唔係拉絲嘅芝士，但佢絕對唔孤寒，成塊pizza你都會見到滿滿嘅芝士～特別係佢唔係厚批，亦唔係薄批，係介乎中間，又有小小脆，又有批嘅口感～
好食指數 8/10

土耳其米飯布甸

第一次食土耳其甜品，老闆話呢個米飯布甸係必點嘅～一食落去，呀祖話覺得好似雪糕，我就覺得好似凝固咗少少嘅西米露～用飯粒做甜品真係第一次試～估唔到會咁夾！
好食指數 8.5/10

土耳其咖啡

好似飲咁中藥。好似飲咁廿四味。呢個咖啡，我地兩個唔識欣賞～ :P
好食指數 5/10
想試下新嘢，不防試下土耳其大餐喇～～～～～

價錢：
特色土耳其薄餅 $98
土耳其什錦燒肉 $288
土耳其米飯布甸 $46
土耳其咖啡$38

付款方式：Visa/Master，現金
伊斯坦堡土耳其餐廳
地址：尖沙咀新文華中心1樓115-120號舖