旅遊網訂酒店格價 平房價 VS 平里數

去旅行總要訂酒店，Asia Miles同某啲旅遊網站有合作，訂酒店可以賺里數。近期有兩個旅遊網站做緊限時優惠，會有額外里數送，今次同大家睇下邊間賺得多啲，同埋價錢可以相差幾遠。

 

里數比率各不同
唔同嘅旅遊網站，賺里數嘅比率各有不同，有啲亦唔包括稅同手續費，只計房價。

旅遊網站 / 里數比率
Agoda.com / 每$10 = 最少2里數
Ctrip / 每$22 = 3里數 (不包括稅項及費用)
Expedia / 每$10 = 2里數
Hotels.com / 每$10 = 2里數 (不包括稅項及手續費)
Kaligo.com / $10 = 最少4及最多12里數
Rocketmiles / 每房每晚最少500里數

例如Agoda要揀PointsMax優惠套餐先有里數。

 

近期Kaligo.com同Rocketmiles都有做訂房送額外里數優惠：

Kaligo.com
優惠期至：5月5日
住宿日期：12月31日或之前
優惠
以電郵登記，並以該登記電郵預訂酒店，累積消費簽賬滿$2,000，可享1,000額外里數；累積滿$7,000，可享4,000額外里數。

Rocketmiles
優惠期至：6月15日
住宿日期：6月15日或之前
優惠
通過Rocketmiles以推廣編號「asiatc」訂房，可獲雙倍里數，每晚住宿可獲1,000 - 20,000里數，同時Rentalcars租車可獲享額外500里數一次。

咁邊間訂會抵啲呢？做下比較先，就以5月15至17號，入住東京「哥斯拉」酒店－格拉斯麗新宿酒店 (Hotel Gracery Shinjuku) 雙人房 (Double Room) 2晚計：

以價錢計，最平嘅係Ctrip，大約$2,185.26就訂到，不過里數就賺得少啲。Agoda.com就賺得最多，有成2,550里數，但只有特定房價先可以賺到里數，價錢亦貴啲 ($3075.18)。價錢上Ctrip同Agoda.com相差$889.92，里數相差2,464，大約要$0.36=1里數，而一般里數價值會當係$0.1=1里數，抵唔抵大家可以衡量下。

如果計里數比率，都係Agoda好啲，但如果計埋限時優惠，就係Kaligo.com稍勝。又同Ctrip比的話，價錢相差$648.75，里數相差2,314，大約要$0.28=1里數。

當然，唔同酒店喺唔同網站嘅價錢都有浮動，例如A酒店喺A網站平啲，B酒店喺A網站反而貴咗，所以都係嗰句－格價吧。

 

網購卡訂酒店再賺
賺完旅遊網站嗰邊嘅里數，再用埋網上簽賬有額外里數優惠嘅信用卡，賺多一筆里數。用返以上例子，去Agoda.com訂房 ($3075.18)，可以賺到：

渣打亞洲萬里通萬事達卡
網上簽賬$4=1里數
可賺768里數
合共3,318里數
比率$0.93/里

建行(亞洲)eye卡
－網上簽賬5X積分 +「賞即飛天地」旅遊類簽賬額外2X積分
15分=1里數
可賺1,435里數
合共3,986里數
比率$0.77/里

 

留意跨境港幣交易手續費
雖然以上網站都可以用港幣交易，亦可能有香港版 / 繁體中文版網頁，不過最後收錢嘅就可能係海外總/分公司，咁就會造成跨境港幣交易，即係喺海外用港幣做交易，有啲銀行係要收手續費。如果取消預訂，退錢可能會再收一次手續費。
會收跨境港幣交易手續費嘅銀行有中銀、渣打、建行(亞洲)、東亞、大新、富邦、華僑永亨、創興，視乎卡種而定，一般係0.8%。之前建行(亞洲)有得豁免，唔知而家仲有冇。

以上嘅旅遊網，Agoda.com同Ctrip都係香港收單，其他就係海外收單。