情人節海景餐廳 4大浪漫推介

情人節快到，話有平靚正嘅餐廳等大家訂枱，都係呃你嘅啫。兩口子好浪漫咁食番餐豐富又美味嘅晚餐，梗係餐廳環境至緊要啦。如果唔想情人節喺巿區拖住另一半同人迫，打算搵個清靜啲環境共晉晚餐，咁就啱了。下文我哋為大家介紹4間遠離巿區，又有美麗海景嘅餐廳，等大家同另一半享受難忘嘅一餐。佢哋依家仲訂到枱架，睇啱就打電話訂喇！

 

世外桃源 Hemingway's By The Bay

 

愉景灣環境幽靜，又有唔少美食，但因為出入一係要搭船，一係捱耐車程，所以平日唔多區外人入嚟，亦唔見自由行旅客，可以話係繁囂嘅香港中一處世外桃源。

愉景灣嘅D'Deck近住碼頭，餐廳林立。不過要注意嘅係，未必所有餐廳都有海景之餘，其實1樓嘅餐廳亦未必多海景枱，所以情人節想同另一半臨海食餐豐富晚餐，同時遠眺迪士尼8點鐘放嘅煙花，最好就去地下嘅餐廳。

我哋為大家介紹嘅餐廳，就係D'Deck地下嘅Hemingway's By The Bay。呢間餐廳標榜加勒比海風情美食，出名食燒烤嘢。此外，漢堡、pizza同豬肋骨都係佢哋熱賣嘅美食。

如果鐘意飲酒嘅朋友，呢度都啱你，事關佢哋嘅rum酒種類齊全，用嚟調配出嚟嘅cocktail，味道隨時喺香港其他地方飲唔到；當然，其他如啤酒、紅酒、白酒等，亦十分齊全。情侶飲飽食醉，就可以過個甜蜜浪漫嘅情人節晚上啦。

另外，因為D'Deck想吸引區外人嚟消費，所以搞咗個免費渡輪優惠，喺佢哋嘅餐廳食滿$120，拎返張收據去碼頭服務台，可以獲得即日八達通免費渡輪服務一程，返回中環；一對情侶食夠$240，2個人都有免費船搭，詳情上D'Deck Discovery Bay個網睇返。

 

▼Hemingway's By The Bay

 

▼食完飯，可以手拖手落去沙灘行吓

 

▼可以望到迪士尼8點鐘嘅煙花

 

 

日落佳餚 BB海景餐廳

 

跟住落嚟要介紹嘅，係喺南丫島榕樹灣出晒名嘅BB海景餐廳。呢間餐廳嘅復古裝潢同擺設，已經夠晒吸引，加上其賣點之一嘅日落海景，喺情人節同另一半望住日落共晉晚餐，夠晒難忘。

呢間餐廳嘅招牌菜係Rockefeller式焗蠔、烤比目魚扒同豬仔骨，平日每人消費200幾蚊已經可以食得好豐富吓，但情人節果日佢哋就加推個情人節套餐，不過未收加一已經要$498一位，情人節當晚食唔食情人節套餐，真係見仁見智喇，老闆話唔食情人節餐都冇所謂，可以照嗌平時餐單上嘅嘢。

入嚟榕樹灣食嘢嘅情侶要注意，返去中環嘅尾班船喺晚上11點半開出。

 

▼無敵日落海景

 

▼Rockefeller式焗蠔係佢哋招牌菜

 

 

地標餐廳 The Boathouse

 

情人節唔想去離島，又想喺海邊餐廳好浪漫咁同另一半食番餐好，咁就要畀多少少錢喇。

赤柱一直係情侶拍拖歎美食嘅勝地。赤柱大街以前非常出名嘅鬼屋餐廳，早已經變咗做The Boathouse餐廳喇，布置用上帆船素材，但依然係赤柱嘅地標性餐廳。

呢間餐廳分做三層，底層仲有戶外餐枱添。食完沿住海邊行，行去美利樓同卜公碼頭，都幾好feel架，但要注意嘅係，訂2月14日嘅枱的話，要先向佢哋銀行戶口過數$500當按金架！

點解筆者唔介紹美利樓內嘅餐廳？事關裏面唔少餐廳，唔多向海嘅餐枱，訂咗枱都未必做到吹住海風同情人共晉晚餐。

 

▼The Boathouse繼承前身鬼屋餐廳，依然係赤柱嘅地標性餐廳

 

▼室內布置簡約，主要以帆船為主題

 

▼天台的一層，從呢度望海，簡直一流

 

▼Chilled Seafood Platter值得一試！

 

浪漫情調 Le Bristol

 

屯門黃金海岸商場嘅法國菜餐廳Le Bristol，出名食生蠔、煎鵝肝同焗田螺，室內裝修充滿地中海浪漫情調，對出望住黃金海岸遊艇會，情調同布置上本身已經好適合兩口子嚟食嘢。

嚟到情人節當晚，職員話佢哋會停咗平日個餐飲餐單，改為情人節情侶套餐，頭盤、湯、主菜、甜品當然唔少得啦，食材都有鵝肝、魚翅呢啲名貴嘢架，但係價錢係$1,688兩位，加埋一埋單要$1,857，夠買廉航去日本機票囉，但情人節嘅嘢，錢解決到嘅問題就唔係問題，最緊要冧得到另一半啫。

 

 ▼Le Bristol位於黃金海岸近臨海位置，景色優美

 

▼日落景望到停泊嘅遊艇同黃金海岸酒店

 

▼情人節套餐餐牌

 

以上咁多間餐廳，筆者都問過晒，截稿時仍然可以訂枱。各位記住，情人節食乜送乜，都係早啲準備有着數，有咩甩漏，可以好大鑊架！你我都懂的！