2015預算案的樓市啟示

財爺公布完2015/16年度財政預算案，有人歡喜有人愁，歡喜當然係食老綜嘅朋友(公平講句，今次中產都袋唔少糖)，愁嘅當然係望穿秋水嘅「想上車一族」。

成份報告針對細價樓篇幅主要在第129段：「樓市自去年四月起轉趨活躍，價格和成交均顯著上升。中、小型單位的價格更錄得雙位數的升幅。現時外圍形勢複雜，美國加息時間和步伐以及歐日央行的進一步寬鬆政策，均可能為本地樓市帶來重大的影響。市民若要置業必須加倍小心，衡量市場逆轉時自己所要承擔的風險。政府會繼續密切留意市場情況，在有需要時，我會毫不猶豫推出措施，維持樓市的健康平穩發展，以及保障經濟和金融系統的穩定。」

唔好意思浪費咗你幾分鐘，無錯係廢話。另一方面，財爺估計今年推出的住宅用地約可興建19,000單位，比去年26,300個更少！喂喂喂，689唔係話房屋供求失衡去到尾聲咩？如果你信佢，真係要驗下智商… 唔好成日鬧地產霸權，真真正正操控香港土地供應嘅係政府。

既然生殺大權係佢手，689又巴巴閉閉擺個強人款，點解唔再出手打擊炒樓或者大大力推樓推地呢？ 原因好簡單，2013/14年度賣地收入841億，佔當年政府總收入(約4500億)五分一。再多舉一個數字，2014/15年雙倍印花稅(DSD)收入達223億，相比之下寬減薪俸稅、個人入息課稅和利得稅加上提高子女免稅額，埋單也不過是197億。綜援、高齡津貼、長者生活津貼和傷殘津貼獲發三糧，加上替公屋低收入住戶代繳一個月租金共花費66億，DSD一年收入可以俾政府豪三年。邊個會咁蠢去殺生金蛋嘅母雞？某程度上，供應少加辣招係劫富濟貧，只係苦了「想上車一族」。

至於居屋，預算案提出由按揭證券公司推出新補價貸款擔保計劃，協助業主向房委會或房協補地價，加強資助房屋流轉。有人話會吸引更多人炒居屋，問題是原業主租咗或賣咗單位，佢住邊呢？好啦，當有好多人揸住兩層樓，其中一層係居屋。向按揭證劵公司申請貸款一般要先俾一筆過保費，大概是樓價 2%，然後每年以浮動利率俾利息(今年是 2.75%)，加上每年貸款額 1.25% 保費，連財爺自己都話同向一般銀行借無咩分別，即是又係廢招。

所以2015樓市基本上無咩變數，美國加息？阿爺就減息！可以預期樓市繼續升，而升幅應該不比舊年高。