召喚牛河博士

民以食為天，餐廳係咁出新奇刺激好玩既菜式唔係咩出奇事，但係大家選擇幫襯邊間餐廳，除左係為左件食物之外，其實都係為左消費一種所謂的生活品味、生活態度。好似你去茶仔想食個菠蘿油、炒粉麵，或多或少都係睇中間餐廳夠平民夠地道；你去半島酒店食High Tea，你就係想食佢高檔、(好似係)上等材料、美景等元素，如果唔係，邊得黎咁多港女影High Tea相放Facebook等你有得睇冇得恨，只可以呻一句這些機會不是屬於我的？

                               
                                            想知點解曹博士被稱牛河博士？請Google

之前唔知係台灣定內地，肯德基早餐有粥同燒餅賣……OK，你話呢個世界上有樣野叫雞粥，我接受，咁你再出皮蛋瘦肉粥、香糯薏米粥係咩意思呢？我去KFC，擺明係想食雞，仲要係炸、明知係熱氣野果隻。你比兜粥我，同我講為左配合我地民族既文化黎一次創新既CROSSOVER(下刪三千字解釋)，我只想問一句：

  「我想食粥，咁點解我唔直接去粥舖食呢？」。

  「其實我地仲有燻雞燒餅」……OK，YOU WIN。

所以，對於M記開始係6點後提供飯捲、碟頭，我個人感到相當不安。聽唔少人講，個飯餐得好少飯，粟米得幾粒，仲有報紙話有人搵到棵西蘭花上有蟲蟲……如果以上全部係事實，我唔明，我開始睇唔透，點解賣美國快餐主義既M記，今日竟然要賣食人唔飽又唔抵既雞扒飯！點解唔賣豆腐火腩飯？又點解唔賣好多網民期待已久既乾炒牛河？睇怕都要召喚牛河博士研究研究。

                                                       

                         有個POST(唔記得邊度睇返黎)話飯捲好似加埋包薯條先至等於趣飯既重量

P.S(有P.S已成慣例)今朝聽早霸王講佢地拎黎做實驗既M記包離奇消失，到底兇手係邊個呢？佢又會唔會食物中毒呢？波地SIR快D做野啦，我食住花生等睇好戲。