​Mega Miles不再 Asia Miles新推廣縮水?
​Mega Miles不再 Asia Miles新推廣縮水?
相關信用卡:

​Mega Miles不再 Asia Miles新推廣縮水?

發表日期: 2015 年 10 月 26 日 更新日期: 2015 年 10 月 26 日 Asia Miles 信用卡生活
作者:Lady C.

呢兩年Asia Miles喺年尾都會推出「Mega Miles獎賞」,只要喺8個非航空類別嘅夥伴機構賺取特定里數,就會有額外里數獎賞。好多里數達人都會等呢個時候將儲落嘅信用卡積分轉做大量里數,因為呢個都係認可里數,咁就唔需要特登再大量消費都可以賺盡額外里數。不過今年就冇Mega Miles,由「自由組合百萬里數賞」取而代之,玩法有變,得返3,100實賺額外里數咋。


抽獎贏大額里數
先講講今年「自由組合百萬里數賞」點樣玩,首先去登記,然後喺8個非航空類別包括金融及保險、酒店、電訊、汽車及運輸、零售、餐膳及宴會、旅遊及消閒、專業服務嘅夥伴機構消費而符合最低消費要求,都會視為認可交易。所賺到嘅基本里數,就會視為認可交易。當喺2個夥伴類別賺到認可里數,就會有500額外里數,每多1個類別,就多100額外里數;喺3個或以上夥伴類別賺到認可里數,就再加2,000追加里數,最多可以賺到3,100額外里數。至於推廣期內擁有最多認可交易數量嘅頭300位人士,就可以參加抽獎,有機會中1,000,000 (3名) 或100,000里數  (30名) 。


今年即使玩盡8個類別,實賺嘅都只係得3,100額外里數,同以前起碼20,000里數實在差得遠。雖然有1,000,000同100,000里數抽獎,但唔知消費幾多先入到頭300名,就算入咗圍都未必抽得中,好似我呢啲黑妹真係唔使用諗。如果唔想太花精神時間,玩3個類別會輕鬆啲,因為2個類別得500額外里數,一上3個類別就多2,000 + 100額外里數,而之後每多1個類別都係加100額外里數,唔係差好多。

以里數入賬日期計算
呢個推廣交易日期由10月22號至12月6號,所賺里數要喺2016年1月24號或之前入到Asia Miles戶口先計數。所以如果有心玩,就要留意每項交易嘅里數幾時會入到Asia Miles戶口。信用卡積分換里數通常都會話4至8個星期入賬,不過個別銀行其實幾日就搞掂。至於其他消費,就可能真係要成個幾兩個月先入到數,所以大家要自己預時間啊。

留意非認可交易
另外要留意有啲交易係唔包嘅,例如:
-夥伴機構額外里數優惠
-信用卡迎新里數
-信用卡積分兌換里數推廣
-美國運通卡會員獎勵積分轉換里數
-美國運通航空企業卡所賺里數
-其他銀行產品所賺里數
-Asia Miles iShop所賺里數
-points.com、「易賞錢」、ESSO積分轉換所得里數
-航空公司類別消費所賺里數

認可交易建議
以下係一啲比較簡單,亦唔會花費太多嘅認可交易。我諗緊用美國運通國泰航空信用卡去夥伴餐廳食夠$300或以上,係咪可以一次過做2個類別交易呢?咁當我用美國運通國泰航空尊尚信用卡,本地簽賬$6=1里數,去食$300飯Asia Miles會員$2=1里數,再去Clarins買$500嘢Asia Miles會員$8=5里數,3個類別簽賬就賺50 + 150 + 83 + 312 = 595里數,再加額外2,600里數,一共3,195里數,即係大約$0.25/里數。

-美國運通國泰航空信用卡簽賬 (金融及保險)
-信用卡積分轉換里數 (金融及保險)
-夥伴餐廳簽賬$300或以上 (餐膳及宴會)
-網上購買指定機場快線車票 (汽車及運輸)
-香港電訊TheClub積分轉換里數,300 / 100分換 300 / 100 里數 (電訊)
-Clarins、Samsonite或樂事會購物簽賬滿$500 (零售)
-Agoda.com、Expedia、Hotels.com、Kaligo.com預訂酒店及完成入住 (旅遊及消閒)