虛擬銀行與傳統銀行Online Banking有何分別？

介紹完虛擬銀行嘅基本概念，另一個用家嘅最大問題：傳統銀行都有Online Banking好多年啦，咁同虛擬銀行又有乜嘢分別？比起傳統銀行，Virtual Bank又有何優勢？不如等我哋比較吓。

虛擬銀行同傳統銀行Online Banking有何分別？

1. 無實體分行

虛擬銀行本身同傳統銀行最大分別就係無實體分行。傳統銀行客戶通常都習慣去銀行分行處理大大小小嘅事，無實體分行可能會有啲唔方便，同時傳統銀行亦都有提供網上銀行畀客戶進行簡單嘅操作。但虛擬銀行會提供返網上嘅渠道俾客戶，虛擬銀行可以做每周7天、每天24小時，7X24隨時隨地進行交易，客戶毋須親臨實體分行，所有服務由開戶到申請銀行服務都係透過網上或用手機進行，例如：只要掃瞄身份證、影自拍照，再遞交個人資料就可以辦理開戶手續。

2. 銀行服務集中

相對於傳統銀行，虛擬銀行提供嘅服務冇咁多樣化。始終仲新，現時虛擬銀行普遍只提供存款同埋私人貸款服務，客戶透過虛擬銀行就冇咁多其他金融服務可以選擇，例如買賣股票，買保險或買賣外幣等要遲啲先有。一啲有較多金融服務需求嘅客戶嚟講，虛擬銀行暫時就未能提供所有所需嘅服務。

3. 提取現金方式簡單

啲錢存咗喺銀行，始終好多情況下仍然需要用現金，虛擬銀行冇分行或者ATM，提取現金可以會有啲唔方便。不過自從推出咗轉數快，虛擬銀行客戶可以透過轉數快網絡（轉數快 FPS 支付系統介紹），將錢即時轉賬到傳統銀行，再到ATM提款，其實分別冇想像中咁大。

虛擬銀行有乜好處？

相較傳統銀行，虛擬銀行有以下優惠。

優惠較吸引

考慮選用邊一間銀行，其中一個主要因素一定係提供嘅優惠。虛擬銀行正正因為冇實體分行，租金、人工等營運成本都可以減少，電子化亦有助減省成本，而且相對係新加入市場，變相會提供更吸引嘅優惠，例如高存款利息、低貸款利息等等，吸引新客戶。

不設最低存款額要求

另一個受惠於低營運成本嘅好處就不設最低存款額要求。相對傳統銀行，唔少都仲設有最低存款額要求，如果客人嘅銀行結餘低過存款額要求，就要收幾百蚊手續費。咁虛擬銀行不設最低存款額，變相降低收費，都係個吸引嘅地方。

開戶手續簡單

由於所有銀行服務，包括開戶都係只需透過網上完成，客戶掃瞄身份證、影自拍照，再遞交個人資料就可以辦理開戶手續，不需要再去分行排隊辦理手續，節省時間。