$94酒店自助餐 任食甜品pizza芝士撻
$94酒店自助餐 任食甜品pizza芝士撻
相關信用卡:

$94酒店自助餐 任食甜品pizza芝士撻

發表日期: 2016 年 08 月 08 日 更新日期: 2016 年 08 月 08 日 飲食
作者:Yvone 二方

唔好成日以為食酒店自助餐好貴呀!最近發現有間酒店自助下午茶超抵食,係$100蚊有找嗰隻。有冇咁荀?
麗豪酒店就推出咗個意式自助下午茶,叫做「意式情迷」薄餅及甜品自助餐。初頭見到呢個名,心諗,得薄餅同甜品?好似唔多吸引喎...上網又搵唔到好多資料介紹。基於人一世物一世乜都要試吓嘅關係,我就去同大家去實地考測吓!

個自助下午茶由下午3點鐘開始食到5點,一行入去就不禁哇咗一聲,好靚啊!如果鍾意甜品嘅見到咁盛大嘅情況都一定為之瘋狂啊!

 


▲見到咁樣一碟碟排得咁靚,真係睇到都開心!


▲架上面就會放一杯杯嘅甜品,好似奶凍同埋啫喱就會喺呢度搵到喇!

坐定咗之後,就冷靚吓自己巡場睇吓有咩食先!餓咗咁耐當然想食啲熱食鹹食打打底先,個場入面有3個熱食嘅盆,熱食隔離就有放pizza、烘焗包點嘅地方,我就差唔多逐樣都食勻試吓。雖然佢個自助餐名係得甜品同薄餅,但原來實際上唔只咁少嘢!
 


▲佢講得叫做pizza自助餐,當然要睇吓pizza先。原來得2款,有啲失望,不過就有好多其他麵包類,酥呀、撻都有。啲酥同撻個皮都焗得好鬆化,係高質嘅!右邊個蘑菇撻同中間嗰個酥我都覺得好好食啊!


▲喺另一邊仲有一個好澎湃嘅麵包corner,有好厚嘅蛋沙律火腿三文治同埋巴拿馬火腿多士。有猶豫過好唔好食個三文治,話晒咁大舊會滯,不過來到點都要試吓嘅!原來佢個包係加咗香草,超香!食完想食多件,但真係會好滯所以放棄咗。


▲現場得3個熱食盆,不過唔 代表佢得3款食物,因為佢會不停變換款式!所以要keep住留意有冇新嘅熱食啊!


▲另外唔好遺漏咗佢呀!佢同周圍啲裝飾融為一體,睇真啲其實食得㗎!


▲其實佢係一個waffle cone入面裝住意式三文魚。溫韾提示食到底要小心啲,如果唔係要搞到自己一手油。


▲腸仔係熱食嘅長場駐場成員!加埋茄汁幾惹味,食得多甜品可以中和吓。


▲熱食仲有燒豬仔骨(右邊)同埋燒鴨肉(左邊)。


▲蜜糖黑椒雞翼,我嘅最愛!個表面整得夠乾身,黑椒嘅惹味加上蜜糖嘅甜味,對我來講永遠係雞翼嘅perfect match!


▲芝士焗青口


▲肉醬薯條


▲肉丸呀!唔使去到宜家都有肉丸食,我就比較鍾意呢個茄汁版本嘅肉丸。


再睇吓甜品,我真係要整張砌圖同大家講現場係有幾咁多甜品呀!甜品都係細細一碟或者一杯杯,唔好以為任食就求其啊!每一碟每一杯都擺得好精美㗎!

 


▲冇入鏡嘅仲有馬卡龍、cupcake同啫啫喱。馬卡龍好似出咗頭一轉就不見了,所以一開始見到就拎咗先喇。
 

由於甜品真係有好多好多,所以我揀咗幾款較有特色嘅來講~首先登場嘅係Tiramisu。呢個真係堅・好好食!一用叉整落去,下面嗰個蛋糕底係會有咖啡滲出來,而且個咖啡味係好濃好醇,大大力推薦!

 


▲第二人個要推嘅係呢個綠茶紅豆卷,個綠茶味夠濃,而且個cream入面係有紅豆,而cream嘅份量都算多,係略嫌個蛋糕唔算太鬆軟。順帶一提,塊葉都食得㗎!


▲之後要出場嘅就係呢個士多啤梨奶凍!雖然現場有好多各式各樣嘅奶凍,不過以我呢啲咁鍾意奶嘅人來講,要食當然要食原味!士多啤梨同奶凍好夾,可以令個味道冇咁單一,又唔會冇咗本身奶凍嗰陣牛奶味。佢仲有個緣茶奶凍都唔錯的!


▲流心芝士撻。諗咗一陣都唔知放佢鹹食定甜食好,都係喺呢度講啦。呢個芝士撻一切開,入面啲芝士係流質狀態,而且個皮好脆,好好食,不過小心食滯。


▲小丸子配士多啤梨果醬。鍾意mochi mochi口感嘅朋友要留意喇~呢度有好多小丸子,不過個士多啤梨醬都幾濃味,建議撥走啲果醬,咁先食到小丸子本身嘅味道~


▲呢個朱古力撻一定要提,因為呢個朱古力真係好好好朱古力!佢成舊都係朱古力餡,而且係幾硬身吓,我食咗一半就覺得好「漏」繼續唔到。除非你真係好鍾意好鍾意朱古力,如果唔係我會建議你同人share。個味道係好香,個朱古力係好食嘅,但我漏到投降。


▲你睇吓個質感幾咁厚實!朱古力味係好濃,味道偏向黑朱古力。


▲個自助餐仲包一杯餐飲,都幾大杯。我就會建議要啲茶類飲品,消消滯嘛!


總括來講,先講熱食方面,質素都幾滿意。麻煩啲嘅位係因為得3個盆,唔同嘅熱食會喺唔同嘅時候出現,要不停望住有咩新嘢出。同埋如果你想食晒熱食先食甜品咁就做唔到喇!

麵包類我覺得質素頗高的,好多撻其實都好食,不過要留意呢類好易食滯,要留肚食甜品!

甜品類有好多選擇,除咗食到一、兩個覺得怪怪哋,其他都覺得唔錯!奶凍係意大利風格,都幾大陣奶味,而且有好多款奶凍選擇,鍾意奶嘅人士可以去試吓。而且佢擺碟各樣都好精緻,朱古力都印晒花咁,唔食就咁睇都開心!個tiramisu我就大大力推,一定要試!

呢個自助餐星期六、日同公眾假期都有供應,原價每位$158。去Openrice度download張coupon出示返可以享有買一送一嘅優惠(加一以原價計算),2個人去食$188走得,除番開每個人都係$94,好抵食!

意廊 Avanti Pizzeria
沙田大涌橋路34-36號麗豪酒店地下

想抵上加抵,由2016年7月15日至9月14日,憑渣打/MANHATTAN信用卡於本地,海外零售簽賬及網上簽賬滿指定金額,當中全港食肆簽賬可享回贈:

累積任何合資格簽賬(該階段):HK$20,000 或以上
當中合資格本地食肆簽賬之現金回贈#比率:18%
最高現金回贈(該階段):HK$480
最高現金回贈(整個推廣期):HK$960

累積任何合資格簽賬(該階段):HK$10,000-$19,999
當中合資格本地食肆簽賬之現金回贈#比率:8%
最高現金回贈(該階段):HK$240
最高現金回贈(整個推廣期):HK$480

累積任何合資格簽賬(該階段):HK$5,000-$9,999
當中合資格本地食肆簽賬之現金回贈#比率:8%
最高現金回贈(該階段):HK$120
最高現金回贈(整個推廣期):HK$240

推廣期
階段1:2016年7月15日至8月14日
階段2:2016年8月15日至9月14日

信用卡優惠詳情可以去番〈呢度〉睇。