8個訂平靚正民宿小貼士

雅軒提提你：8個訂平靚正民宿小貼士

現時自由行大行其道，雅軒都係一個鍾意周圍去嘅人，特別係捐窿捐罅，遠離遊客區。
所以住民宿、Hostel、Couchsurfing 已經係雅軒必搵嘅旅行住宿～
以前搵民宿好麻煩㗎，要逐個民宿網站睇或者係朋友介紹多。不過體驗當地生活已經係近年旅行嘅大趨勢，所以雅軒就講下要訂住平靚正民宿有咩貼士同要注意嘅地方啦。

1.越早訂越好
因為訂民宿唔同酒店，預訂民宿係要兩方面同意先Okay嘅，所以好少Last Minute發生，最好預早一至兩個月，因為你訂咗，對方都可能Reject你，你又要再揀再問，而且而家太多大型網站搵到民宿，平靚正好快無！
2.唔好重複訂房
民宿大多係小本經營，唔同大酒店，真係唔好同時Book幾間，人地好難再租返出去！好似AirBnb 呢種大民宿網，會互相比Comment大家，你做過嘅，下一個房東都會知道，而且有好多係無得退訂。重點：尊重是在任何地方都要有的！


3.講價
民宿有一個很好的地方是可以直接溝通，如果訂嘅日子多都可以問下有無優惠！雅軒成日同房東傾多陣計都會問下～

4.清楚民宿地址
民宿好多時資訊唔夠清楚，一定要問，因為的士唔會識去！最好出發前印咗地圖，詳細地址，附近有咩地標，好似7-Eleven，Starbucks呢啲係GoogleMap見到嘅店，同埋房東電話。大部份房東都好樂意Guide你去民宿，仲有講定幾時會到！人地唔會24小時等你㗎！特別係雅軒成日搭廉航，啲時間真係好奇怪㗎～
＊我自己會用Google Map個街景認一認啲路！
5.留意服務費、清潔費、地方稅等額外收費
而家嘅民宿網多咗一樣叫服務費，就網站收的，而清潔費個價錢係無定實的，超級浮動！仲有地方稅，芝加哥、巴黎、阿姆斯特丹同印度都要額外再俾，所以訂嘅時候要睇清楚，可以差好遠架！通常都係㩒到去俾錢個頁就一定有寫～

6.優惠方法
除咗講價，間唔中會係優惠網搵到Coupon代碼，好似hotukdeals.com成日出Airbnb 嘅Promo Code。Airbnb仲有一樣叫旅行基金，邀請好友加入Airbnb，然後你個好友用一次Airbnb，你就會有US$25架啦！其他網站都有大同小異既優惠～
7.格價
這是必然的！以前雅軒係直接向個間民宿訂就一個價啫，而家民宿都放曬上唔同嘅大網站，間間服務費都唔同架！而且有啲地道啲嘅網站可能價錢差少少，但係有更多隱藏靚民宿～
雅軒小分享：
日本： http://www.jalan.net/
台灣：http://www.fun-taiwan.com/
韓國：https://www.kozaza.com/
當然不少得雅軒最愛的：https://www.airbnb.com.hk/

8.了解清楚民宿
識睇一定睇留言！留意其他住過嘅客人講啲咩，睇下房東Friendly？乾淨？好唔好人？同埋有咩設備問題，好似有無升降機同獨立洗手間。同埋「知己知彼」，俾多啲自己資訊對方，好似男定女，識唔識當地話，係邊到黎等等。雅軒試過同房東由佢接我開始，全程用GoogleTranslate！佢話佢特登帶iPad，譯啲字會大隻啲。好好笑～

大約係咁多啦，雅軒去過好多次自由行，都撞板撞咗好多次，咩類型嘅旅行問題都可以問下我，我識答都會答㗎～